Nongpoh, Nohprah 28: Da ka jingshim khia ka KSU lyngba ka Employment Monitoring Cell ha ryngkat ka KSU North Khasi Hills District Unit ban dawa na u Dean ka College of Post Graduate studies in Agriculture Science, Umiam ban buh ia ka jaka thoh exam ha Umiam ka la urlong, hadien ba mynta ka sngi na ka liang katei ka skulbah ka la ai da ka jingtoh ban pynkynriah noh ia ka jaka thoh exam na Guwhati sha Umiam na bynta ban pynsuk ia ki samla wad na ka jylla khlem da donkam shuh ban leit sha Guwahati ban thoh ia ka exam wad kam.
Ha ka kyrwoh ba la phah da u Dwipendra Thakuria, Dean ka College of Post Graduate Studies in Agriculture Science, la pyntip paidbah sha baroh ki samla thep na ka bynta ka post Lower Division Clerk (LDC), Upper Division Clerk (UDC) bad Field-cum-Lab-Assistant (FCLA) katkum ki advertisement no. 4/2023 haduh 16/2023 la wan rah biang ia jaka thoh exam ha CPGSAS Umiam ban long ka jaka ban thoh exam ym shuh sha Guwahati ka ban long ha ka 3 tarik bad 4 tarik u Kyllalyngkgor 2025.
La pyntip ruh ba ki samla ba thep kam ki ba la jied ia ka CPGSAS Umiam kum ka jaka thoh exam bad ki ba la ioh pdiang ia ki admit card ban thoh exam ha Assam Downtown University, Guwahati ki dei ban pyntip sha u Dean CPGSAS (email id: deancpgs@gmail.com) ia ka jingkwah jongki ban pynkylla ia ka jaka ban thoh exam. Ka tarik ka ba khatduh ban pdiang ia ki email jong ki candidate kan dei shwa ka 4:30 pm jong ka 30 tarik u Nohprah 2024. Ki samla ki ban wan thoh exam ki dei ruh ban wan rah ia ki Govt. ID Card (Aadhar/EPIC Card).
Kum ban pynkynmaw, ha ka janmiet ka 28 tarik u Nohprah 2024, ki nongialam ka KSU lyngba ka Employment Monitoring Cell bad ryngkat ki nongialam ka KSU na North Khasi Hills District Unit, ki la tur sha ka ophis u Dean ka College of Post Graduate Studies in Agriculture Science bad ki la ioh ruh ban ia kynduh ia u Dean na ka bynta ban pynkynriah ia ka jaka thoh exam na Guwahati sha Umiam bad tang shi sngi hadien kane ka jingdawa ka KSU ka la urlong ha kaba la rah noh ia ka jaka thoh exam na Guwahati sha Umiam kumba la dawa na ka KSU ban pynsuk ia ki samla wad kam kiba thep kam na ka bynta ka post Lower Division Clerk (LDC), Upper Division Clerk (UDC) bad Field-cum-Lab-Assistant (FCLA) ha katei ka skulbah.
