Nongpoh, Lber 03: Ki Nongïalam ka HYC Raid Nongtung circle hapoh ka jingïalam u Bah Hercules Suting kum u President ka seng mynta ka sngi ki la leit ban kynduh ïa u ADC ka Ribhoi u Raja Brahma ban buh ïaka jing ujor halor ka jingshah khrong khajna beaiñ ki Nongrep kiba sah ha jaka Khappud kaba hap hapoh ka Raid Nongtung ha kawei ka khyrdop kaba ap daki briew jong ka Assam.
Ha katei ka jingleit ïa kynduh ïa u ADC ka Ribhoi u Raja Brahma uba dei ruh u Border Magistrate nalor u bah Hercules Suting President ka HYC Raid Nongtung circle uba dei ruh u President ka HYC Ribhoi la synran lang ruh da u Samla S. Masharing General Secretary HYC Raid Nongtung Circle lem bad ki dkhot jong ka Circle.
Haba kren sha ki lad pathai Khubor Hadien katei ka jingïakynduh, u Bah H Suting u la ïathuh ka jingleit jong ka seng ban ujor syndon sha u Border magistrate ka dei Hadien ka jing wan ud daki paidbah kiba shong ba sah haki jaka Khappud kaba hap ha Raid Nongtung halor ka jingshah lum khajna beaiñ ki Nongrep ha kawei ka khyrdop kaba Don ha Lumsohphoh ba la ap daki briew jong ka Assam (West Karbi Anglong).
U Samla Hercules Suting, u la pynpaw ba ka seng ka dap daka jingsngewkhia halor katei ka jingwan shim kabu daki briew kiba nabar ka jylla ban lum khajna beaiñ ïaki Nongrep kiba sah ha kitei ki thaiñ bad katei ka jingdon katei ka khyrdop beaiñ ban lum khanjna naki Nongrep ka la wan rah shibun ki jingeh ba nalor ka dor jong ki mar rep ka la nang hiar bad ki Nongrep ki la nang shah khñiot haka dor mynta ki la ngat sa haka jingshah lum khajna ha katei ka khyrdop bad kane ka lah nang ktah shuh shuh iaka ioh ka kot jong u duk u rangli ha kitei ki thain.
Ka seng ha kane ka jingleit ban kynduh ïa u Magistrate ba dei peit ïa katei ka kam ki la kyntu jur ba naka liang ki bor shynshar district ki dei ban shimkhia mardor bad ban pynbeit kham kloi ia kane ka kam khnang ba kan nym ktah ia u paid nongshong shnong jong katei ka thaiñ.
