Nongpoh, Rymphang 03: Hadien shiphew sngi ba u Chancellor ka University of Science and Technology u Mahbubul Hogue u la shah kem ha ki Pulit ka Assam, ka Ïingbishar Gauhati High Court mynta ka sngi ka la ai jamin, kaba dei hadien ba utei u Chancellor ka USTM u la shah kem ha ki Pulit ka Assam ha kaba ia dei bad ka Case 54/2025 ba la rejistar ha Patharkandi, Sribhumi bad sa kawei ka Case 55/2025 kaba la ujor pyrshah ia u la buh sngi ban shong bishar ha ka 4 tarik, Lber, 2025.
Haba kren halor kane ka jingshah kem u Chancellor ka USTM, ka Ïingbishar Gauhati High Court ka la shong bishar ha ka sngi Thohdieng kata ha ka 28 tarik Rymphang, 2025, kaba dei halor ka jingpan jamin da u Mahbubul Hogue bad ia kane ka rai la pynmih noh ha ka 3 tarik u Lber 2025.
U Chancellor ka USTM u la shah kem ruh ha ka 21 tarik u Rymphang, 2025 ha ki Pulit ka Sribhumi ha ka jylla Assam bad la ialam noh ia u Mahabubul Hogue sha Dispur Police Station ban pynlong ia ka jingtohkit kata shwa ban tian bishar hakhmat ka ïingkashari ha ha Sribhumi District kaba la long ha ka 24 tarik, Rymphang, 2205 bad kaba dei ruh hadien ba la pyndep ia ka medical examination ha Karimganj Civil Hospital.
La ong ruh ba ha ka 25 tarik, Rymphang, 2025, ka ïingkashari ka la ai hukum ia u Hoque bad kynthup ruh ki 5 ngut kiwei pat kiba la shah kynnoh donkti ba kynthup ia u Hiramani Saikia, u Bijoy Dutta, u Rezzak Ali, u Numaan Ahmed bad ia u Imdadur Rahman ba hap banset ha Thanat Pulit na ka bynta ka jingtohkit kaba 4 sngi.
Ban pynkynmaw halor kane ka jingjia, u Chancellor ka USTM u Mahbubul Hoque ula shah kem ha ka 21 tarik u Rymphang ha ki pulit Assam bad ha ka Special Task Force halor ka Case kaba la dep ban registar ha Sribhumi, Assam, kata hadien ba la mih ka jingkynnoh ba ka la don ka jingleh thok ia ka eksamin CBSE ha ka skul kaba la pyniaid da ka ERDF ba u Mahbubul Hoque ula long kum u Chairman.
