Mawkyrwat, Jylliew 03: Haba leit ialap election MP shiteng samoi mynta ka sngi ha Wahkaji, South West Khasi Hills, u Dr. DRL Nonglait kum u kyrtong ka NPP u la pan ka jingkyrshan kaba jur na ki ki paidbah ka thain Wahakaji bad South West Khasi Hills ban pynjop don burom ia u ha kane ka kynti, khnang ba lada u shah jied kum u MP kan pynsuk ia u ban iakhun tyngeh ban pynrung iaka ktien Khasi ha ka khyrnit ba phra ka riti synshar ka ri bad ruh ban dawa na ka bynta ban pyntreikam ia ka ILP hapoh ka jylla.
Kum u kyrtong ka NPP ha kane ka election MP shiteng samoi, u Dr. DRL Nonglait haba kyrpad ban pynjop ia u kum u MP na rilum Khasi-Jaintia kam mut satia ba un ia khun tyngeh ban ioh ka jingithuh ia ka ktien Khasi bad ban pyntreikam ia ka ILP, hynrei un ia khun ruh halor shibun ki kam pynroi ba donkam u paidbah ha ka jylla.
Kiwei ruh ki mat kiba u la ia kren nalor kitei ki mat kiba la dang sahteng kum ka ktien Khasi bad ka ILP, u la kular ruh ban phai khmat kyrpang sha ki nongrep bad kumjuh ruh ban kyntiew ia ka pule ka puthi hapoh ka jylla kun uta u nonghikai ha skulbah NEHU uba la tip kham bha shaphang ka jingling jingman jong ka pule ka puthi hapoh ka jylla.
Ha kane ka sngi la don ryngkat ruh kiwei kiwei ki nongialam ka party NPP ba kynthup naduh u Bah Kitborlang Nongrem, State Secretary ka NPP ba dei peit ia ka South West Khasi Hills, u Dr. K.K. Nongsiej, District President ka NPP South West Khasi Hills District, bad u Bah Hamletson Dohling, Working President ka NPP Meghalaya State Unit ha kaba kajuh ka sur ki la kyrpad jur ia ki paidbah katei ka thain ban kyrshan tyngeh ia u Dr. DRL Nonglait khnang ba un lah shisha ban wan rah ia ka jingkylla bad ka jingangnud jong u paidbah hapoh ka jylla hi baroh kawei.
Sa peit ruh
