Khliehriat, Jymmang 04: Ka Joint Action Committee (JAC) jong ka East Jaintia Hills Truck Owners Transport Association (EJHTOTA) bad ka Jaintia Hills Truck Owners Association (JHTOA) mynta ka sngi ka la pynlong ïa ka jingïalang ha Phramer ban ïakren halor ki jingeh kiba la slem bha bad ki kompani cement ha East Jaintia Hills, khamtam ka Star Cement bad ka Dalmia Cement, naka bynta ki trok kiba ju kit cement na kitei ki karkhana.
Haba kren sha ki lad pathai khubor hadien ka jingïalang, u Chairman ka JAC, u Biangshwa Shylla, u la ong ba ka JAC ka dang bteng ïa ka jingïakhih (strike) khlem pud la ar taïew mynta halor lai tylli ki mat kiba kongsan ka Star Cement, ka Dalmia Cement bad ki bulker truck. U la ong ruh ba bun ki trai truck kim pat tip bha shaphang kine ki bulker truck kiba kit cement powder khlem song, bad u la kyntu ïa ki nongkit nongbah ban sangeh noh ban pynkit ïa kine ki bulker namar ka jingïakhih ka dang ïaid shakhmat.
U Chairman u la kyntu ruh ïa ki nongkit kiba ju pynpoi mar na ka Dalmia Cement sha Jorabat ban sangeh noh mardor, bad u la ai jingmut ruh ïa kito kiba thmu ban leit kit na Dalmia ba kin ym leh ïa kata namar ka jingïakren bad ka kompani ka dang ïaid. U la ong ba ka JAC ka la leit ruh sha Guwahati ban ïakren bad ki bor pynïaid kompani, hynrei la shu ai tang ki jingkular, bad naka liang jong ki kila pynskhem ruh ba lada ki kompani kim wan sha distrik, ka JAC kan ym mih shabar u pud u sam jong ka.
Halor ka Star Cement, u la ïathuh ba ka kompani ka la pdiang ïa ki jingdawa jong ka JAC ha ka jingïalang ba dang shen bala don lang ruh u Deputy Commissioner bad u Superintendent of Police ka East Jaintia Hills. Kumta la weng noh ïa ka jingïakhih pyrshah ïa ka Star Cement, hynrei ka dang bteng pat pyrshah ïa ka Dalmia Cement bad ki bulker truck.
U Chairman u la pynbna ruh ba yn pynlong ïa ka jingïalang paidbah lashai ka sngi ha ka por 11:00 mynstep ha Tuberkmaishnong Tahkhniang, bad u la kyrpad ïa ki dkhot jong baroh ar tylli ki seng bad ki Dorbar Shnong ba kin ai ka jingïatreilang.
Halor ki jingïakren ha ophis u DC, ka JAC ka la kam ba ki jingeh bad ka Dalmia Cement ki dang sah kumjuh khlem pat don jingïapynbeit. Ki trai truck ki la mad jingeh ban siew ïaki ram kali namar ka jingduna ka jingioh ban kit cement. Ka JAC ka dawa ba ka Dalmia Cement ka dei ban ai 14 tylli ki jingkit, 7 tylli naka bynta kawei pa kawei ka seng.
Naduh ba wan ki bulker truck, ka jingioh kit ki trok ka la hiar bha, bad ki jingïoh bynta ban pynpoi sha ki jaka tei (construction) kiba ju leh da ki truck jong ki seng, mynta la shimti da ki bulker. U Chairman u la kynnoh ruh ba kine ki bulker truck ki lait na ka siew khajna jylla bad kim wanrah jingïoh pisa satia ïa ka jylla.