Nongpoh, Jymmang 05: Ka seng Hynniewtrep Achik National Movement (HANM) Western Ri Bhoi kala pra syndon phum hadien ba ki nongialam lem bad ki dkhot baroh da kawei ka jingmut kila shim iaka rai ban khylliap lama noh iaka seng mynta ka sngi namar ka jingbym sngewiahap iaka rukom treikam u Bah Lamphrang Kharbani, President ka sengkmie.
Kitei ki nongialam kiba la shim rai ban khylliap lama noh iaka HANM Western Ri Bhoi, ki kynthup ia u Bah Sumar Lyngdoh uba bat ruh iaka kyrdan Vice President jongka HANM Ri Bhoi, u Bah Prishon Makri Vice President, u Bah Anthony Sankli General Secretary, Bah Upsait Rani Assistant General Secretary, Bah Phrangsngi Lyngdoh Joint Secretary, Bah Banshan Sohkhwai Education Secretary, Bah Wanshan Rani Sports Secretary, u Sonday Sangma Chief Organising Secretary, Bah Rony Makri Organising Secretary, Bah Plomstar Mawblei Publicity Secretary lem bad 23 ngut kiwei de ki dkhot jongka Executive Committee.
U Bah Sumar Lyngdoh haba kren sha ki lad pathai khubor ula iathuh na ka liang ka jong u lem bad ki dkhot ka HANM Western Ri Bhoi hi baroh kim don satia ia kano kano ka daw shimet pyrshah iaka seng, hynrei ka jingshim rai ka jongki ban mih noh bad khylliap lama noh iaka HANM Western Ri Bhoi kadei beit thik namar ka jingbymsngewtynnad bad jingbym sngewthuh jingmut bad u Bah Lamphrang Kharbani.
Haba pyrshang ban kylli iaki daw ba ki don pyrshah bad u President ka sengkmei, u Bah Sumar Lyngdoh ula ong ba um kwah satia ban thad madan ia kiei kiei ki jingleh jong u Bah Lamphrang Kharbani naba kan sa long pynban ka jinglehrain iaka seng hi baroh kawei, bad ba naka liang ka jongu lem bad ki dkhot hi kim pat kwah ban poi shaduh uta u pud.
U Bah Sumar Lyngdoh u la iathuh ruh ban aka liang ka jong u lem bad ki dkhot ki la pyrshang na ka por sha ka por ban iakren sngewthuh bad utei u President ka sengkmie, hynrei ki shu sahkut tang haki jingkren khlem da poi shano shano ruh, kaba la pynlong iaki ban sngewdapram bad ym lah shuh ban ia treikam ryngkat bad hap ban shim syndon ia kane ka sienjam kaba rangbah ban rai mih noh naka seng.
Shuh shuh, u Bah Sumar Lyngdoh u la ong hadien ka jingpyrkhat sani hapdeng ki para nongialam bad dkhot baroh, da kawei ka jingmut ki la shim iaka rai ban khylliap lama noh iaka HANM Western Ri Bhoi bad pyntip bad naduh kane ka sngi, kin nym iadon bynta shuh bad ka seng ha kino ki kam nangne shakhmat.