Nongpoh, Naitung 13: Na ka jingshah ktah jur ki nongrep kba ha ka thain Umtngam ha Ri Bhoi District kaba ktah na ka jingshlei um na ka wah Umiam bad ruh ka jingduna poi um sha ki pynthor kba, u MLA ka Mawhati u Bah Charles Marngar mynta ka sngi u la hiar la lade ban leit jurip bad ban pynlong ia ka jingialang ban sngap ia ka sur ki nongrep kiba shah ktah ha ka jingrep kaba.
Ha kane ka jinghiar u MLA sha katei ka thain la don lang ruh u Bah Kerborlang Synrem, Divisional Officer ka tnat Soil and Water Conservation, Nongpoh Division, ha ryngkat ka jingdon lang ki nongialam shnong bad ki Nongrep kiba shah ktah ha ka jingrep kba.
Ki ba shah ktah ki la kot da ki 600 tylli ki longïing ba rep kba na ka shnong Tyrso, Umtngam, Sohphoh bad kiwei kiwei ki shnong bad ki don lai tylli ki khap um ba kynthup ia ka umputhi, ka Bansaistar Water user Association bad ka Chum Chum Tyrso Valley Water Users Association ba do kiba mat na ka jingshlei um ba hap thung kaba biang haduh 3 sien bad don pat ki pynthor kba kiba ym ioh um ban rep kba na ka jingbym poi um lyngba kitei ki khap um ba pynpoi um na ka wah Umiam.
Sa pule ruh : Dang Bishar Ka Sorkar La Yn Ai Song Pisa Ïa Ki Longïing Jong Kiba Ïap Tdem Ha Lapalang
Haba kren ha kane ka sngi sha ki lad pathai khubor, u MLA ka Mawhati u Bah Charles Marngar u la ong ba ka daw kaba la pynlong ia u kum u nongmihkhmat ban leit jurip ia ki pynthor kba ba shah ktah na ka jingshlei um bad ruh ba pynlong ia ka jingialang ka dei halor ka Nongrim ba ki nongrep na katei ka thain ki la ujor sha u halor ka jingshah ktah na ka jingshlei um sha ki pynthor kba ha katei ka thain kaba dei na ka jingshlei um ka wah umiam.
U la ong ruh kiba bun ki pynthor kba ki ioh um na ka wah Umiam na ka bynta ban rep ban riang, hynrei tang shu jur u slap ka la ju don ka jingshlei um kaba pynjot lut ia ki pynthor kba bad don pat ki pynthor kba kiba ym ioh ia ka um na ka jingbym biang ki nala um ban pynpoi ia ka um sha ki pynthor kba.
U la iathuh ruh ba ki don lai tylli ki khap um lane ki nala um ba kynthup ia ka Khap umputhi, ka Bansaistar Water user Association bad ka Chum Chum Tyrso Valley Water Users Association, ha kaba ki nongrep ki ioh um lyngba kitei ki khap up, hynrei ka jingbym biang ki khap um ka la wan rah ka jingshlei um bad ki don ruh ki pynthor kba kiba ym ioh um na ka daw ka jingbym biang ki nala um.
“Da ki 600 tylli ki longing ki im jakpoh na kaba rep kba, hynrei ka jingshlei um bad ka jingbym poi um sha ki pynthor kba ka la buh jingeh ia ki nongrep bad teng teng don ki nongrep kiba hap ban thung kba haduh 3 sien hadien ba la pynjulor ka um ia ki pynthor kba na ka jingshlei um” ong u Bah Charles Marngar.
Namarkata, u la bynrap ba kum u MLA u sngewkhia halor kane ka jingeh ki nongrep bad ha kawei ka bynta u pynpaw ia ka jingkmen ba don lang u Divisional Officer ka Soil and Water Conservation ba un shim khia lang ia kane ka jingshah ktah ki nongrep ban thaw ia ki lad ki lynti ban pynbha ia kitei ki khap um lane ban thaw da kiwei kiwei ki lad na ka sorkar khnang ban weng noh ia katei ka jingeh ki nongrep kiba shah ktah na ka jingshlei um ha ki pynthor kba bad ruh ka jingduna um ha ki pynthor kba, u la bynrap.
Sa peit ruh
