Kum shi bynta ka jingrakhe ia ka jingdap 10 snem ka Bethany Hospital Outreach Nongpoh, kane ka Hospital ka la pynlong da ka jingiamareh thong ba la tip kum ka ‘10th anniversary run’ ba la pynlong ha ka Sngi Saitjain bad la sakhi ia ka jingwan shim bynta ki samla kynthei bad shynrang.
Ia kane ka jingmareh thong la wan ban shim bynta ruh da u MLA ka Nongpoh, u Bah Mayral Born Syiem kum u kongsan ban plie paidbah ia kane ka jingiamareh thong ki samla, kaba long shi bynta ban bankhia ia ka koit ka khiah da kaba la ia shim bynta shithrem ki samla.
Kum ban pynphuh pynphieng ia kane ka jingiamareh marathon ne ka jingiakop ia mareh thong, la sakhi lang ruh da ka jingdon lang ka Kong Kmoin Wahlang bad la synran lang ruh daka jingdon ka Kong Darishisha Iangjuh, kiba la long kum ki nongmihkhmat ban ia bishar lang ha kane ka jingiakop mareh thong.
Ia kane ka jingiamareh thong la phiah ruh ha ki ar bynta ba kynthup ia ka jingjngai kaba 10 km bad 5 km na ka bynta ban ia phiah lang ia ki nongshim bynta katkum ka rta jongki.
Na ka liang ki bor pyniaid ka Bethany Hospital ki la sam ruh da ka khusnam pisa bad ki syrnod bad ruh ka medal sha ki nongjop kaba long shi bynta ka sngi sah jingkynmaw halor kane ka jingwan shim byntaha kane ka jingiakop mareh thong kaba long shi bynta ka jingrakhe dap 10 snem katei ka Hosptial kaba la shakri ia ki paidbah ka Ri Bhoi bad ka jylla ha kaba ai ka jingsumar sha kiba pang ba shitom.
Lyngba kane ka sngi, la sam ruh ia ki khusnam kyrpang sha ki nongshim bynta ba khynnah bad ba la rangbah tam ha kane ka jingiakop mareh thong. Na ka liang ka Bethany Hospital Outreach, Nongpoh, ka la ai khublei kyrpang ruh sha baroh ki nongshim bynta bad pynpaw ruh ka jingkhublei sha ki nongjop bad ki noingwan shim bynta.
