Nongpoh, Naitung 23: Ki Paidbah Naka Shnong Umdap Dumu bad Umdap Rngi ha ryngkat bad ki Pulit hynne ka janmiet ki la ioh ban sei ia ka met jong uwei u Rangbah Briew uba la shah tap ha u lum hadien ba ka la twa bad leit ban ia ka iing trep kaba u sah ban rep ban riang.
Katkum ki tyllong khubor, la suba bad katei ka jingjia ka la jia naduh ka 20 tarik Naitung ha kipor ba ther u lapbah uba la neh kumba 3, 4 kynta eiei.
La iathuh ruh, utei u Rangbah u dei uba shong ba sah ha Byrnihat hynrei u ju leit sah ban rep ban riang ha katei ka khlaw kaba don haka Shnong Umdap Rngi mynta la bun bun snem. Ka jingbym poi iing jong utei u Rangbah ka la pynsuba sniew ïa u para jong u bad mar mar u la leit ban wat sha katei ka khlaw bad la lap pynban ba ka khyndew ka la twa bad tap iaka iing trep kaba u sah bad hadien utei u para u la leit ban pyntip sha ki bro Shnong bad sha ki Pulit Byrnihat.
Mar ia ioh jingtip halor katei ka jingjia naka liang ki Pulit Byrnihat bad ki Pulit ka Fire & Emergency Service lem bad ki briew Shnong ki la leit ban kyndang ia katei ka khyndew daka Puh Shilum bad hadien ba jingialeh kaba 3 lane 4 kynta eiei kata hakapor 4 baje janmiet eiei ki sa ioh ban sei ia ka met jong utei u Rangbah.
Sa peit ruh
