Sikkim, Jymmang 21: Palat 2000 ngut ki nongshang kai suwari ki la hap ban sahkut noh namar ka jingtwa khyndew kaba shyrkhei ha ka thaiñ North Sikkim kaba la jia tang namar ka jingiai bteng ban hap u slap ba jur ha katei ka thain.

Katkum ka khubor ba la iohlum, la iathuh ba la hap ban pynduh noh shwa ia ka online permit na bynta ki nongwan jngohkai kiba thmu ban leit sha Lachen bad Lachung namar ka jingbteng ka jingtwa khyndew ha katei ka thain.

Na ka liang u District Collector ka Mangan u Anant Jain, u la pyntip ba kumba 2,000 ngut ki tourist kiba la wankai sha kane ka thaiñ mynta la ar ne lai sngi ki la hap ban sahkut noh namar ka jingtwa khyndew kaba la ktah jur ia ka thain Phidang–Chungthang ha kaba ka jingtwa khyndew ka la jia naduh mynmiet na ka jingbteng ka jinghap slap.

Na ka liang ki bor ka Border Roads Organisation (BRO) bad u General Reserve Engineer Force (GREF) ki la nang treishitom ban weng ia ka khyndew bad ban pynlait ia ka jingsahkut ka khyndew bad la antad ban shim por kumba katto katne kynta.

Ki bor pyniaid district ki la pyntikna ruh, ba ka jingpyrshang ban pynlait ia ki nongwan kai sumari ka la nang iaid shakhmat bad ban wan ialam noh ia ki sha Gangtok.