Shillong, K’Lyngkot 16: U Myntri Rangbah ka jylla u Conrad K. Sangma mynta ka sngi u la pynbna ba ka sorkar jylla ka la rai ban wan rah ia ka kaiphod jong ka State reservation Policy ha ka dorbar mang tyngka ka ban long ha ka 16 tarik u Rymphang haduh ka 27 tarik u Rymphang 2026.
Haba kren sha ki nongthoh khubor mynta ka sngi, u Conrad K. Sangma kum u myntri ryngbah ka jylla u la ong ba ka kynhun ki myntri sorkar mynta ka sngi ki la dep ban ia kren ne ia thir halor ka State Reservation Policy bad la dep ban ia rai ruh ba ka dorbar mang tyngka ka de ban sdang ha shiteng bnai jong u bnai Rymphang.
“Haba phai halor ka jingai jingmut, ka kynhun myntri ka sorkar ka la rai ruh ba kan kham bha ban wan rah ia ka kaiphod ka expert committee ha kane ka dorbar mang tyngka” ong u Myntri rangbah ka jylla sha ki nongthoh khubor.
U la iathuh ruh ba ka sorkar jylla ka la buh ruh ia ka tarik ban pynlong ia kane ka dorbar mang tyngka naduh ka 16 tarik u Rymphang haduh ka 27 tarik u Rymphang 2026 bad mynta ka sah sa tang ka jingai rai ba khatduh da u lat ka jylla.
