Nongpoh, Nohprah 09: Hadien ka jingrem noh u Bah George B. Lyngdoh kum u MLA ka Umroi Constituency, kaba u la iakhun na ka party All India Trinamool Congress (AITMC) ha ka election MLA 2023 na Umroi Constituency, ki nongialam kane ka parity naduh u Bah George B. Lyngdoh kum u President ka Umroi Block bad u State Vice president ka AITM ryngkat kiwei ki nongialam ki la pyndkut noh ia ka jingiadei da kaba ki la iehnoh kam noh na kane ka party halor ka jingkynnoh ba ki paidbah ka Umroi Constituency kim pat lah satia ban pdaing ia kane ka party kaba wan na rithor.
Dei hadien ka jingphet noh kitei ki nongialam bad ki dkhot na katei ka party AITMC, kine ki nongialam ki la pynpaw ba ki la seng noh da kawei ka kynhun ba la tip kum ka Umroi Constituency Progressive Forum (UCPF), na ka bynta ban dang bteng ka jingshakri ia ki paidbah bad ruh ka jingpynkhreh ban pynmih ia u kyrtong shimet ban ia khun ha ka election MDC 2025 na Umroi Constituency lyngba kane ka shatri jong kane ka Forum.
Haba kren sha ki lad pathai khubor mynta ka sngi, u Bah Bah George B. Lyngdoh, MLA barim ka Umroi bad ruh u President barim ka AITMC na Umroi bad Vice President AITM ha ka jylla bad ryngkat u president ka Umroi Constituency Progressive Forum (UCPF) u Bah Pynskhemlang Sohtun, ki la iathuh ba ka daw kaba ki la seng ia kane ka Forum ka dei ka jingangnud ban dang shakri ia ki paidbah ka Umroi Constituency bad ruh ban pynmih kyrtong ban ia aireng ha kane ka election MDC 2025 na Umroi Constituency.
Ki la iathuh ruh ba ki la shim ia ka rai ban seng ia kane ka Forum, ka dei tang ka rai jong ki nongialam bad ki dkhot bad shuwa ban sengi kane ka Forum ki la dep ban ia phylliew jingmut naduh ki nongialam, ki dkhot bad ki Nongkyrshan na ki Unit bad ki Area bapher bapher ba hap hapoh ka Umroi Constituency.
Kum ka jingpyntip sha baroh ki paidbah hapoh ka Umroi Constituency, ki la ong ruh ba kane ka Forum ka la dep ruh ban thaw ia ka Election Committee bad kino kino ki riew pawkhmat kiba kwah ban ia khun ha kane ka election MDC na Umroi ki lah ban wan thep kyrteng, hynrei ka rai kaba khatduh ban na ka bynta ban pynieng ia u kyrtong ka dei ka rai jong ka Election Committee kaba hap ban bishar ne ia tai sani ia uno uba ka party ka hap ban ai ticket kum u kyrtong ban ia khun ia kane ka election MDC 2025 na Umroi Constituency.
Shuh shuh, ki la buh ruh ia ka jingkyrpad naduh ki paidbah ka Umroi Constituency, ki nongialam bad ki nongkyrshan ba kin ai ia ka jingiatrei lang bad kane ka Forum, khnang ba lyngba kane ka Forum kin lah ban pynmih ia u nongmihkhmat paidbah ha kane ka election MDC ba ka thong jong kane ka Forum ka long ban shakri bad ban phaikhmat paidbah na ka bynta ka bha ka miat bad ka roi ka par jong ki paidbah hapoh ka Umroi Constituency, ki la bynrap.
