Shillong, Rymphang 19: Ka khubor kaba la pur stet halor ka jingkhlad kaba kyndit kyndit jong u Dr. Ricky A.J Syngkon, MP ka Shillong Seat bad uba la khlad noh ha Dr. H. Gordon Robert Hospital, ka la pynkyndit ia ki paidbah ha Ri Lum Khasi bad Jaintia hi baroh kawei bad halor kata, la iohi ia ka jingleit bad tuid kiba ieid ba thoin jong u bad kiba haiing jong u Dr. Ricky A.J Syngkon sha katei ka jaka sumar ba la pynbna khlad noh ia u Dr. Ricky A.J Syngkon.

Tang mar ia tip halor katei ka jingjia ba khlad kyndit noh u Dr. Ricky A.J Syngkon, la iohi ba ki hehduh ha ka sorkar jylla, kata naduh u Conrad K. Sangma, Myntri Rangbah ka sorkar jylla, nangta u Bah Prestone Tynsong, Symbud Myntri Rangbah, u Bah Ardent Miller Basaiawmoit, President rangbah ka Voice of the People Party (VPP) lem bad kiwei, kata naduh ki MLA kiba don ha ka liang synshar bad liang pyrshah ki la poi sha Dr. H. Gordon Robert Hospital, na bynta ban pynpaw ia ka jingsngewkyndit halor ka jingkhlad kaba kyndit kyndit jong u Dr. Ricky A.J Syngkon.