Shillong, Naiwieng 10: Haba phah khubor sngewlem sha ka ing ka sem bad ki khun ki kti jong u Shipai Aibok Madur, uba la duh noh ia la ka jingim, ha ka jingiada ia la ka ri na ki nongshun, u Myntri rangbah ka jylla u Conrad K. Sangma, u la pynbna ba ka sorkar jylla kan iarap da ka song pisa kaba T. 20 lak na ka bynta ka ing ka sem kiba la duh noh ia une samla kum u shipai uba iada ia la ka ri.
Kum ban pynkynmaw, u Samla Aibok Madur, u la rung sha ka kam shipai ha u snem 2014 ha ka Assam Regiment bad u dei na ka shnong Mawbri ba hap ha ri Bhoi District. U la don ruh ka lok bad uwei u khun shynrang ha kaba u la poi kha sha ka shnong Lyngkhoi ba hap ha East Khasi Hills. Ka long pat ka khubor kaba sngewsih ba ha ka 7 tarik u Naiwieng 2024, u la duh noh ia laka jingim, katba u dang ai ia ka jingiada ia la ka ri ha Siachen Glacier jong ka jylla Jammu & Kashmir.
Na ka liang u Myntri rangbah ka jylla, u Conrad K Sangma, haba leh burom ia une u shipai mynta ka sngi, u la phah ruh ia ka khubor sngewlme sha ka ing ka sem bad sha ki khun ki kti jong u, ba kane ka jinglen lade une u shipai na ka bynta ban iada ia ka ri kan iaid sah bad iai kynmaw shi junom.
U la pynpaw ruh ha ka rynsan X, ba kane ka jinglen lade bad ka jingiada jong une u shipai ia la ka ri, ki dei ki dak ba u don ia ka jingieit kyrpang ia la ka ri bad kum u shipai u la len lade ban iada ia la ka ri na ki nongshun bad kane ka jingkhlad noh jong u, ka long ka jingduhnong ia ka ia ka sem, ka jylla bad ka ri hi baroh kawei.
Shuh shuh, u la ong ruh ba ka sorkar jylla ruh ka pynpaw ia ka jingduhnong kaba khraw ia ka jingkhlad noh ia une u shipai bad sorkar jylla ka don ryngkat ha kum kane ka por ba ka ing ka sem bad ki khun ki kti ki ia kynduh ia kane ka jingsngewsih ba u lyoh badum u wan kah na ka jingduh noh ia une u shipai uba la khlad noh na ka jingiada ia la ka ri kum u shipai ba shlur.
