Shillong, Nailar 24: Hadien ka jingthombor ki bor pulit ia ka Ophis treikam ka KSU ha Jaiaw ha ka miet jong ka 19 tarik u Nailar da kaba siat tear gas ban thwet ia ki nongialam ka seng, kaba la pynlyngngoh shisha ia kiba bun balang bad wat ia ki nongshong shnong ha Jaiaw, ka KSU mynta ka sngi ka la pynher biang ia ka lama jong ka seng ha katei ka ophis treikam ka seng kum ka jingpyneh rngiew iala ka seng kaba shakri na ka bynta ka ri bad ka jaid bynriew.
Ha kane ka jingpynher lama ka seng kaba long kum ka jingpyneh rngiew, la don lang ruh naduh ki nongialam barim ka KSU ba kynthup ia u Bah Samuel Jyrwa, u Bah Lambokstarwell Marngar, u Bah Auguster Jyrwa lem bad kiwei kiwei ki nongialam barim ka KSU bad ki nongialam ba thymmai ka KSU CEC.
Haba kren sha ki lad pathai khubor, u Samla Pynshaiborlang Rani Assitant General Secretary KSU CEC, u la ong ba kane ka jingpynher lama ka seng ha ka ophis treikam ha Jaiaw, ka dei ka jingpyneh rngiew hadien ba la wan thobor da ki bor pulit, ba kum ka seng ka la rai ban dang pynkhlain ia ka jingshakri na ka bynta ka jaid bynriew.
Pule ruh:La ioh iaid sahuh ki Kali paidbah ba la weng ki Dribar Tourist ia ka jingiakhih ha Jorabat
U la ong ruh ha kane ka sngi la pynlong ruh ia ka jingduwai ba kyrpang na ka bynta ka seng kum ka jingpan bor na u Blei ba kane ka ophis treikam ka seng kan long kum kata ka shlem ban dang lah shuh shuh ban saindur na ka bynta ka lawei jong ka jaid bynriew.
Peit ruh:
Shuh shuh, u la bynrap ruh ba ka KSU ka la ioh pdaing ia ka shithi ba khot ia kren ka sorkar mynta ka sngi bad ban shim ia ka rai halor katei ka shithi ka seng ka la rai ban pynlong ia ka jingiakynduh lang ha ka 25 tarik u Nailar 2026 na ka bynta ban shim rai halor katei ka shithi ba la ai da ka sorkar ban ia kren halor ki san tylli ki mat ba la dawa na ka sorkar jylla.
