Shillong, Rymphang 05: Ka Hynniewtrep Youths Council kala pynrem jur ïaka jingthung ïaki Officers on Special Duty (OSDs) sha u Myntri Rangbah ka jylla ba kane ka jingthung ïa kitei ki OSD ka dei ka bym khuid bad ka dei tang ka jingpynlut kai ïaka pisa u paidbah.

“Ïa ki jingthung kam la shul eh lyndet nadien jingkhang, katba ïa ka pisa paidbah kaba heh bha la pynlut sha ka tulop, ki jingïarap, ki jingtei ophis, ki kali, bad kiwei kiwei ki jingmyntoi jong ki khlem ka jingkitkhlieh ïa ki paidbah jong ka Jylla,” ong u president ka HYC u Roy Kupar Synrem ha ka kyrwoh ba la pynmih ha ka sngi mynta ka sngi Palei.

Ka HYC ka la buh jingkylli ïa ki jingtbit bad ki jingmyntoi jong ki briew ba la thung, da kaba kylli, kiei kine ki briew, kiei ki jingtbit jong ki, bad ki shakri naka bynta ka jingmyntoi jongno? Ka sorkar MDA lane u Myntri Rangbah um lah ban kheiñ ïaka pisa paidbah haka jingpynlut shimet jong ki.

Ka HYC ka pyrshah jur ïa ka jingpynlut kaba heh na ka pla tyngka jong ka Jylla ïa ki OSD kiba ki bynta, ki jingkitkhlieh, bad ka jingdonkam jong ki kim shai. Ka pisa paidbah ka dei na ka bynta ka pule puthi, ka koit ka khiah, ka roi ka par, ka lad pynioh kam pynioh jam ïaki khun samla, ym na ka bynta ka jingmyntoi jong ki haka kam saiñ hima sima, ong u Bah Roy.