Shillong, Rymphang 05: Ka Jaintia National Council (JNC) mynta ka sngi ka la pynlong da ka jingiakhih kaba khlem poi pyrkhat ban pynpaw ia ka jingbitar kaba jur halor ka jingleh mynthi ka Jaintia Hills Autonomous District Council (JHADC) ban pyntreikam ia ka ktien Pnar bad ka jingkhaïi beain ki bar jylla ha East bad West Jaintia Hills.

Haba sdang ia kane ka jingiakhih kynsan ka JNC la sdang da ka jingiaid paidbah ba ki la rah da ki lama ïong  bad ki la leit tur ha phyllaw ka JHADC ban pynpaw ia ka jingpyrshah ia ka JHADC, ba ka seng ka la kynnoh ba ka JHADC ka la leh mynthi halor kitei ki ar tylli ki mat ban pyntreikam ia ka Ktien Pnar bad ruh ban tehlakam ia ki kam khaïi pateng beain ki bar jylla ha kitei ki ar tylli ki District ha Jaintia Hills.

U President ka JNC u Bah Sambormi Lyngdoh u la pynpaw ia kata ka jingbym sngewbynniaw kaba khraw ba ka JHADC kam lah satia ban pyrkhing ia ki kam khaïi beain ki bar jylla bad ruh ban ruh ban pyntreikam ia ka Ktien Pnar ha kitei ki ar tylli ki District.

“Ngim dei kiba kwah ban wan rah ia ki huri hura ban pynlong ia kane ka jingiakhih, hynrei ngi kyrsiew thiah ia ka JHADC ba ka don ia kata ka jingkitkhlieh ban phai khmat lem ia ka jingeh jong ki trai District bad ki trai jylla” ong u Bah Lyngdoh, bad bynrap ruh ba ka JHADC ka la dei ban shim khia ban phai khmat lem na ka bynta ka jingeh ki trai district bad ki trai jylla.

Shuh shuh, u la bynrap ruh ba ka JNC ka dawa ruh ban pynduh noh ia ka jingai Trading License sha ki bar jylla bad ban pyndonkam ia ka ktien Pnar kum ka ktien kaba lah ban pyndonkam paidbah bad ban ruh ban khot kyrpang ruh da ka dorbar kyrpang ha JHADC ban ia kren kyrpang halor kitei ki ar tylli ki mat ba la wan rah da ka JNC, u la bynrap.