Shillong, Naitung 11: Ha kawei na ka jingjia kaba ym poi pyrkhat bad kaba ym lah ban mut dur kaba la wan rah pynban ka jingjia ba sngewsih, ki 5 ngut ki briew ki la duh noh ia la ka jingim na ka daw ba ki la leit ban pynkhuid ia kawei ka pung um kaba don ha ka dong Madan ha Lapalang ha East Khasi Hills District.
Kumba la ioh lum jingtip, kane ka jingjia ka la jia ha ka janmiet jong ka 10 tarik u Naitung 2026 ha ka por kumba 7.30 baje janmiet ha Lapalang ba hap ha Rynjah Police Station ha Nongbah Shillong.
Napdeng kitei ki 5 ngut kiba la duh ia la ka jingim , 3 ngut ki dei ki Khasi na ka shnong Thangsning bad 2 ngut pat ki dei ki Nepali kiba thmu ban leit iarap ia ki ha katei ka jingjia ba ki sahkut shapoh jongka pung um.
Katkum ka tyllong khubor ba la ioh lum, la ong ba ha katei ka jingjia ki don 4 ngut ki samla Khasi kiba leit bylla ban pynkuid ia ka pung um kaba jylliew kumba 30 ne 35 phut bad la kynnoh ba ka daw kaba la pynlong ia ki ban duh noh ia la ka jingim ka dei namar ba ki pyndonkam da ka Generator ban pynkhuid ia ka pung um bad hapdeng ka jinglynguh ka tdem shapoh ka pung kim lah shuh ban ring mynsiem ha kaba uwei u la lait im bad 3 ngut pat ki la sahkut shapoh bad duh syndon ia la ka jingim.
La ong ruh ba une uba la lait im, u la pyrta briew ban wan ban iarap halor kane ka jingjia, ha kaba ki don 2 ngut ki Nepali kiba la ioh sngew ia ka jingpyrta ki la leit mardor ban iarap bad phewse kine ki 2 ngut ruh ki la sahkut lang shapoh bad duh ia la ka jingim na ka daw ba kim lah shuh ban ring mynsiem na ka jinglynguh jong ka tdem kaba ki pyndonkam da ka Generator ha kaba pynkhuid ia katei ka pung um.
Kumba la iathuh da u SP ka East Khasi Hills u Bah Vivek Syiem, la ong ba ki bor pulit tang mar ia ioh jingtip ki la shim khia mardor bad la leit ban tohkit halor katei ka jingjia ha kaba la lap shisha ba ki 5 ngut ki la duh ia la ka jingim bad sahkut shapoh jong ka pung um.
Hadien ka jingtohkit kaba la neh slem, da ka jingiarap ki Bor Pulit bad ka kynhun State Disaster Response Team la lah ban sei noh ia ka met jong kitei ki 5 ngut bad la pynkit sha NEIGRIHMS ban leh ia ka postmortem bad ka jingtohkit bnia halor kane ka jingjia ka dang iaid shaphrang.
Shuh shuh, la iathuh ruh ba halor kane ka jingjia ba sngewsih, ki Pulit ki la dep ban register case ha Rynjah Police Station katkum ka Case No. 106(1)/125(a) ka Bharatiya Nyaya Sanhita bad ruh ha ka section 51(b) ka Disaster Management Act, 2005. La ong ruh baia daw tynrai jong ka jingiap kitei ki 5 ngut yn kham tip bniah hadien ka Postmortem examination.
Ha kawei ka bynta, na ka liang u Rangbah Shnong ka Lapang u Bah Pyndap Sohtun u la iathuh ruh ba ki 2 ngut kiba leit ban iarap bad sahkut shapoh ka pung um ki dei kiba dang rit khun bad khlem poi pyrkhat ki la duh pynban noh iala ka jingim.
Peit ruh:
Kum u Rangbah Shnong, u la kyrpad ruh ia ka sorkar ba kan ai jingiarap kyrpang ia ki halor kane ka jingduh noh ka jingim kaba khlem poi pyrkhat bad kum ka shnong ka hap ban ia shong sani ban ia kren ruh halor kane ka jingjia.
Shuh shuh, ki bor sorkar na ka tnat Soil and Water Conservation, na ka Pollution Control Board ha ryngkat ki bor pulit ki la wan poi ha kane ka jaka ban jurip ia kane ka pung kaba ki trai iing ki tih ha phyllaw jong ki ban peit la ka dei ne em kaba katkum ki kyndon ain namarba ka jingiap jong ki briew shapoh ka dei namar ba ym don lyer ba kin ring mynsiem ba la lynguh da ka tdem.
