Nongpoh, Jymmang 08: Shibynta ban pynshlur bad ai mynsiem shuh shuh ia kito ki samla kiba la wan shakhmat ha ka Examination jong ka School Leaving Certificate (SSLC), ki nongialam ka National People’s Youth Front (NPYF) Umroi Block, mynta ka sngi ki la pynkup burom bad ai sngewbha da ki Laptop sha ki ia ar ngut ki samla kiba dei na ki shnong kiba hap ha Umroi Constituency, kata ka dei hadien ba ki la lah ban wan shakhmat ha kane ka exam SSLC kaba mynta u snem.
Kitei ki samla kiba la wan shakhmat ha ka SSLC bad kiba la shah pynkup burom ha ka NPYF Umroi Block, ki kynthup ia u Samla Evanshan Nongrum, na ka shnong Nongthymmai Kyrdem, uba pule ha Sacred Heart Boy’s Secondary School, Shillong, uba la wan ha ka kyrdan ba 2 ha ka top-20 jong ka SSLC examination jong ka MBOSE bad ka Queency Kharsohnoh, kaba pule ha Umroi Presbyterian Secondary School bad kaba la wan ha ka kyrdan ba 7 jong ka top-20.
Haba pynkup burom ia kitei ki arngut ki samla pule kiba la wan shakhmat ha ka SSLC, na ka liang ka NPYF Umroi Block, ka la ai sngewbha ia kitei ki arngut da ki Laptop bad Momento kaba long ku ka jingpynshlur bad ban ai mynsiem ruh ia kiwei ki khun samla jong ka Constituency ba kin dang leh bha ha ki jingpule jongki.
Ha kane ka jingpynkup burom, la sakhi ruh da ka jingdon u Damanbait Lamare, MLA Umroi kum u Kongsan, ha ryngkat ka jingdon u Bah Pynhun Rynghang, General Secretary ka NPYF ha ka jylla, u Bah Rishan Lyngdoh, President ka NPYF Umroi Block, ki nongialam ka NPYF lem bad kiwei.
Na ka liang u Bah Damanbait Lamare kum u MLA ka thain u la pynpaw ia ka mynsiem jong ka jingkmen ba ki mih kita ki khun samla kiba wan rah burom ia ka Umroi Constituency bad kum u MLA u la pynshlur ruh ia ki ba kin dang leh bha sha ki kyrdan kiba shaneng ba kum ka imlang ka sahlang ka dang donkam ia ki samla kiba lah pat ban kit ia ka lyngkor nongialam ban trei na ka bynta ka bha ka miat jong ki paidbah hapoh ka Constituency.
Shuh shuh, u la ai mynsiem ruh ia kine ki 2 ngut ki samla bad kumjuh ruh ia kiwei ki khun samla ka Constituency ba kin pyndonkam hok ia ka sap ba kyrpang ba la ai u Blei la ka long ha ki jingpule ne ha kino kino ki kam ba ki trei, namar lada ki samla ki don ia ka thong khlem poi kin poi sha ka thong jong ka jingjop kaba long ka burom ia ka ing ka sem bad ia ka imlang ka sahlang, u la bynrap.
