Nongpoh, Jylliew 06: Kawei ka longkmie kaba dap da ka jingsngewkhia kaba jur namar ka jingkular bym lah pynurlong da ka Sorkar jylla ban shna thymmai noh ia u surok na Nongpoh-Umden-Sonapur (NUS), mynta ka sngi kane ka longkmie ka la leit tur shapoh ka Secretariat ban dawa pynurlong noh ia kane ka jingkular bad ka la byrngem ban shah jingit haduh ban da iap.
Kane ka longkmie kaba dap da ka jingsngewkhia kaba jur halor ka jingbym urlong kane ka jingkular ban pynthymmai noh ia u surok NUS ka dei ka longkmie ba la tip kyrteng kum ka Bindas Syiem kaba shong basah hapoh kawei ka shnong hapoh ka thain Umden.
Ka Kong Bindas Syiem ka la pynpaw, ia ka jingsngewkhia kaba jur halor ka jingsniew ba palat liam jong u tei u surok NUS mynta da ki phew phew snem kaba la pynsyrtok ia ka leit ka wan u paidbah kiba sah ha ki phew tylli ki shnong ka thain Umden khamtam kito kiba pang ba shitom bad ki khynnah pule kiba leit ba wan lyngba u ne u surok.
Ka la ong ruh, ba ka Sorkar jylla khamtam ki MLA bapher bapher ki la shu ia kren bad rah ia kane ka mat hapoh Iingdorbar Thaw ain bad ban shu pynmih jingkular na ka por sha ka por ban shna thymmai noh ia u ne u surok NUS da ki phew hajar sien hynrei kine ki shu kut tang ha ki jingkular kumta mynta nga la rai ban iakhun ban pynurlong ia kane ka jing pynthymmai ia u surok NUS bad nga la rai ban shong shah jingit haduh ban da iap lada ym sngap da ka Sorkar jylla.
