KYRSHAN KA JD(U) TDP ÏAKA NDA, DAWA DOH KYNDANG HAKA KYNHUN MYNTRI

Ki kynhun synrop jong ka National Democratic Alliance (NDA) ba kynthup ïaka Janata Dal (United) bad Telugu Desam Party, TDP kila rai ban kyrshan ïaka sorkar ba 3 jong u Narendra Modi ryngkat ka jingdawa doh kyndang ba heh haka kynhun myntri jong u Modi.
Naka liang u Narendra Modi u la lum ruh ka jingïalang jong ka NDA haka jaka sah jong u ha Delhi haka sngi balang ha kaba ki nongïalam ba khlieh jong ki party kiba synrop lang bad ka BJP haka NDA kila leit ban shim bynta naka bynta ban ïakren halor ka jingthaw sorkar.
Nalor ki nongïalam ba hakhmat jong ka JD(U) bad TDP ba kynthup ïa u Nitish Kumar bad Chandrababu Naidu la ïa don lang ruh da ki heh jong kiwei ki party kiba synrop lang haka NDA.
Kum ban shu kdew ha kane ka elekshon Lok Sabha ba dang shu dep ka BJP kam lah ban kot ïa u number ban thaw sorkar marwei ha kaba kala ioh tang 240 seats, hynrei da ka jingkyrshan lang jong ka TDP, JDU, Shiv Sena LJP (RV) bad kiwei kala pynpoi ïa u number jong ka NDA haduh 292 bala biang pura syndon ban thaw sorkar.
Kumba la ioh lum jingtip naka liang ka party TDP jong u Chandra Babu Naidu kala dawa ruh haduh 4 tylli ki post minister lada thaw thymmai ïaka sorkar NDA bad kumjuh ruh kiwei kiwei ki party kila dawa ki doh kyndang kiba biang bad lah ruh ban ong ba kane ka sorkar ba mynta kala shah pyniaid ha kiwei ki party ban skhem ka NDA namar ka BJP kam lah ban thaw sorkar marwei bad donkam ka jingkyrshan jong kitei ki party.