Nongpoh, Nailar 24: Naduh ki Kali paidbah bad ki Kali ba kit ia ki nongjohkai pyrthei ne wat ki kali ba kit marbam mardih mynta ka sngi ki la iaid sahuh ha ka surokbah NH-6 ba hap ha Jorabat, kaba dei hadien ba ki Dribar Tourist na Assam ki la weng ia ka jingkhih bad kim shym la pynthud shuh ia ka leit ka wan ki Kali padibah.
Kum ban pynkynmaw, kane ka jingweng noh ki Kali Tourist na Assam ban weng ia ka jingiakhih ha Jorobat, ka dei hadien ka jingiakren ki ar sorkar ha ka sngi Saitjain ba la dep ha Khanapara bad lyngba katei ka jingiakynduh ka sorkar Meghalaya ka la rai ban siew ia ka bai lutksan ki Kali Assam kiba la shah pynjulor ha ka 19 tarik ha Shillong ha ka sngi ba don ka Bike rally ka KSU.
Haba phai dien ha kine ki sngi, ki paidbah ki la syllang shisha ha ka leit ka wan namar ki Dribar tourist na Assam ki la khang syndon ia ki Kali paidbah ne ki kali ba kit marbam mardih la ki dei na Assam ne na Meghalaya, kaba ki pyrshah halor ka jingjia ha Nongbah Shilllong ba ki Kali Assam ki la shah pynjulor bad la don ruh kiba la mynsaw.
Haba sakhi pat mynta ka sngi, katei ka surokbah ha Jorabat ka la kylluid hi wad bad ym don shuh kita kiba pynthud ha kaba naduh ki Kali paidbah, ki Kali tourist bad ki kali ba kit marbam madih ne kiba kit ia ki umnphniang bad kiwei kiwei ki la ioh latluid ban iaid lyngba katei ka surok kaba don ha khappud ka Meghalaya bad ka Asssam.
Peit ruh:
