Nongpoh, Nailur 16: Ia ka metiap jong uwei u samla uba don ha ka rta kaba 21 snem uba la jah na ka shnong Baridua, la lap ba ka la per ha kawei ka jaka ba lang um ne ka pung kaba don hajan ka shnong Baridua, kaba ki paidbah jong katei ka thain, ki shait khot kum ka Blue Dam.
Une u samla ba la lap bad per ha sla um u dei uba la tip kyrteng kum u Rohit Poudel na Baridua ba hap ha Khanapara Police Station.
Ia katei ka metiap jong utei u samla, la lap nyngkong da ki briew kiba la leit ban wad ia u, namar ba u la jah la kumba saw sngi eiei, kumta ha ka jingbteng ban wad ia u, la lap mynta ka sngi ba ka la per ha ka Blue Dam.
Ki briew shnong, haba ki la lap ia katei ka metiap kaba la per ha Blue Dam, ki la pyntip mar mar sha u Rangbah Shnong bad u Rangbah Shnong, u la pyntip sha ki Pulit, khnang ba ki ioh ban leh ia kaba donkam baroh.
Peit ruh:
Haba ki Pulit ki la tip, ki la leit mar mar sha katei ka jaka ha ryngkat ki Pulit Fire & Emergency Services na Narbong bad kiba la ioh ban sei noh ia katei ka metiap na katei ka Pung, hadien kata pat haba la dep ia baroh ki jingdonkam la rah noh ia ka metiap sha Nongpoh na bynta ban leh ia ka Post Mortem.
Kum ban shu kdew hangne, ba utei u khynnah samla, u la jah na iing naduh ka sngi u Blei, kumta ha ka jingiawad da kiba haiing kim shym la lap ia u, tad haduh ba ki la lap mynta ka sngi na katei ka Blue Dam.
