Ha ka jingrakhe ia ka sngi kha ba 155 snem u Mahathma Gandhi uba la tip ruh kum u Kpa ka jaid bynriew ha India, ka Hindu Welfare Society Nongpoh nalor ka jingrakhe ia kane ka sngi bad ruh ka jingsam ia ki khusnam sha ki samla pule ba pass bha ha ka SSLC bad HSSLC ka la ban khia ruh ban pynneh ia ka shongsuk shongsain wat la ngi ia imlang sahlang bad ki jaid bynriew bapher bapher.
Ia kane ka jingrakhe ia ka snngi kha u Mahatma Gandhi la pynlong ha Ing Dorbar Hall Nongpoh Sajer, ha kaba la shim bynta naduh u President ka Hindu Welfare Society u Unteswar Singh, u General Secretary u Madhav Singh, U Assistant Secretary Shnong Nongpoh u Bah Michael Kharhunai bad u Muneshwar Singh, Professor ka Ri Bhoi College nalor ki samla pule bad ki kmie ki kpa.
La sam ruh ia ki khusnam sha ki samla pule kiba la kot 75% ha ka SSLC bad HSSLC bad nalor kata la sam kyrpang ruh ia ka khusnam sha ki 2 ngut ki samla pule kiba long ki topper ha ka SSLC bad HSSLC ba kynthup ia u Krishna Koirala uba ioh ha ka kyrdan 17th position ha ka SSLC bad u Jagjot Singh Nongtdu uba ioh ia ka kyrdan ba shiphew ha ka HSSLC examination 2024.
Ha kane ka jingrakhe ia ka sngi u kha u Mahatma Gandhi bad ka jingsam khusnam sha ki samla pule, ka Hindu Welfare Society ka la ban khia ruh ban pynneh ia ka shongsuk shongsain ha ka imlang ka sahlang bad ka kyrtu jur ruh wat la ngi don shibun ki jaid bynriew bapher bapher bad kum ki nongshong shnong ka ri India ngi dei ban pynneh pynsah ia ka shongsuk shongsain khnang ba ka jylla bad ka ri jongngi kan kiew shaphrang ha ki liang baroh.
Na ka liang u Muneshwar Singh bad u Bah Michael Kharhunai, haba ai jingkren ha kane ka sngi ki la ai khublei ia ka Hindu Welfare Society Nongpoh, kaba la pynlong ia kane ka jingrakhe ia ka sngi kha u Kpa ka jaid bynriew bad ruh ka jingsam ia ka khusnam sha ki samla ba pass bha, kiba dei hi ki jingialam lynti u Mahatma Gandhi ban kyntiew ia ka ri bad ka jaid bynriew.
Ki la pynkynmaw ruh ba u Mahatma Gandhi u dei u nongialam ba khraw ba la tip kum u kpa ka jaid bynriew bad dei lyngba ka jinglen lade jong u, ba ka ri India ka la ioh ia ka jinglaitluid na ka jingsynshar ki phareng naduh u u snem 1947.
Ki la kyntu ruh ban pynneh ia ka shongsuk songsain bad ban ia im kum shi para wat la ngi ia pher ha a jaid byrniew bad dei tang ka shongsuk shongsain kaba ngi lah ban kyntiew ia ka jaid bynriew bad ka ri kumba la ialam lynti da u Mahatma Gandhi ban iakhun ia kano ka thong khlem da ia um snam.
