Napdeng ki 11 tylli ki shnong ba hap hap ha ka Nongpoh Town ha Ri Bhoi District, ka Shnong Mawdiangum ka la shah jied kum kawei na ka shnong kaba khuid tam ha Nongpoh town. Ia kane la pynbna da ka ophis u Deputy Commissioner ka Ri Bhoi ha ka jingialang kaba la long mynta ka sngi ha Circuit House Nongpoh, kaba dei shi bynta ban pynsngewthuh halor ka thong jong ka Swachhata Hi Seva 2024.
Kum ban pynkynmaw, ka jingialap halor ka thong ka Swachhata Hi Seva 2024 ka la sdang naduh ka 17 tarik u Nailur 2024 bad kin pynkut noh ha ka 2 tarik u Risaw 2024, kaba dei ruh ka sngi khraw ban kynmaw ia ka sngi kha jong u kpa ka jaid byrniew ba la tip kum u Mahatma Gandhi.
Ia ka jingsam ia ki khusnam sha kane ka shnong Mawdiangum la wan ban shim bynta da u Bah Mayral Born Syiem, MLA ka Nongpoh kum u kongsan bad la sakhi lang ruh da ka jingdon lang u Additional Deputy Commissioner ka Ri Bhoi, u Raja Brahmah, u Chairman ka Nongpoh Town Committee u Bah S. Lyngdoh, ki Rangbah Shnong bad kiwei kwei de.
Haba ai jingkren ha kane ka sngi kum u kongsan u Bah Mayral Born Syiem u la pynpaw ia ka mynsiem jong ka jingkmen ba ka Shnong Mawdiangum ka la ioh pdiang ia kata ka kyrdan kum ka shnong kaba khuid tam ha Nongpoh Town bad u la pynpaw ruh ba kane ka jingioh pdiang ia kane ka kyrdan kum ka shnong kaba khuid ka dei na ka daw ka jingiatrei lang jong baroh ki nongshong shnong ka Mawdiangum bad ki tnad sorkar kiba don bynta ha kane ka kam ban ialap halor ka khuid ka suba katkum ka thong jong katei ka Swacchta Hi Seva.
Ha kajuh ka por u la kyntu ruh ia ki paidbah nongshong shnong ka sor Nongpoh bad ha ka District hi baroh kawei ba ngin shim lang ia kata ka jingkitkhlieh ha kaba wan rah ia ka khuid ka suba bad ka khuid ka suba ruh ka dei kawei na ka thong jong ka sorkar ban pynlong ia ka jylla bad ka ri kaba khuid khnang ban gin dang lah ban kiew shaphrang ha baroh ki liang lada kum ki nongshong shnong ki lait na ka pang ka shitom haba ki lah ban leh khuid leh suba.
Na ka liang ka ophis u Deputy Commissioner ka Ri Bhoi ka la dang pynshlur ia baroh ki shnong ba hap ha Ri Bhoi District ba kin don lang ia kata ka jingkitkhlieh ban lehkhuid ha ki shnong ki thaw bad kane ka dei ruh kawei na ka thong jong u myntri rangbah ka ri ban pynkylla ia ka ri India kawei na ka ri kaba khuid tam ha ka pyrthei.
