Halor ka jingud jingnam kiba bun ki paidbah bad ba la sakhi ruh halor ki jingjia ba sngewsih ha Civil Hospital Nongpoh, ka Ri Bhoi Youth Federation (RBYF) Sengkmie ha ka jingialam u President ba rangbah u Bah Bipul Thangkhiew lem bad ki dkhot ki la leit ban ia kynduh ia ka Medical Superintendent ka Civil Hospital Nongpoh ka Dr. D. Blah na ka bynta ban pynpaw halor ki mat ba ka seng ka la ioh jingujor na ki paidbah.
Ha kane ka jingiakynduh ia ka MS ka Civil Hospital Nongpoh, ka seng ka la pynrem halor ka jingbym kitkhlieh ka Additional DMHO ka Dr. A.R Marak kaba la kren shai ba kam don bor ban ia kren bad ki nongialam ka seng bad kaba la pynlong ruh ia ka seng ban hap ban leit kynduh ia ka MS na ka daw ka jingbym don ka District Medical & Health Officer.
Kumba la pynpaw da u President ba rangbah, u Bah Bipul Thangkhiew, u la ong ba ha ka jingiakynduh ia ka MS ka Civil Hospital Nongpoh ka pynpaw ia ka jingkmen ba ka la kular ban shim khia ia ki mat ba la wan rah da ka seng bad ka seng ka sngewkhia ruh kumba la ioh lum jingtip ba ka don ka jingleh heh leh meng ki nongtrei ha katei ka Hospital ia ki nongpang kiba leit ban shah sumar ha katei ka Hospital.
U la ong ruh ka seng kan shim khia ia kane ka mat bad kam lah ruh ban pdiang kumba la jia ia kawei ka Longkmie kaba la hap ban kha ia I khyllung ha Painkhana bad kane ka paw shai ba kam don ka jingkitkhlieh ki nongtrei bad kum ki nongtrei ki hap ban shim ia ka jingkitkhlieh haba la shm ia kane ka kam ram bad lada ka seng ka dang ioh ia ka jingujor nangne shakhmat ka hap ban ujor sha ki bor ba halor.
Ha kawei ka bynta, u la ong ruh ba ka seng ka dawa na ka sorkar bad kumjuh ruh ki MLA na Ri Bhoi ba ki dei ban weng noh ia ka Dr. A.R Marak, kaba dei ka Additional DMHO, kaba dei halor ka Nongrim ba ka la kam ba kam don bor ei ei bad ka dei tang ka staff bad kane ka paw shai ba ka jingdon jongka ha katei ka jaka ai jingsumar kam don jingmyntoi na ka bynta ki paidbah ba kam lah ban trei ia ka kam kumba la bynshet da ka sorkar.
Shuh shuh, nalor ba u la ong ba ka seng kan dang buddien ia ki jingduna ha kane ka jaka ai jingsumar bad ha kawei ka bynta ka la dawa ruh na ka sorkar ban plie noh ia ka MCH Hospital ha Umran Parila khnang ba kan pynsting ia kane ka Civil Hospital namar ia ki Longkmie ba armet bad ki khynnah lah ban sumar noh ha katei ka jaka ai jingsumar.
Ha kane ka sngi, na ka liang ki nongialam ka RBYF ki la leit ruh ban ia kynduh ia ki nongthiah pang ha katei ka Hospital kum shi bynta ban kylli pyrthew ia ka jinglong jingman kane ka jaka ai jingsumar bad ka jubab kaba ki la ioh pdiang ka long ba ka jingsumar ka long ba biang bad ki hun ruh ia kata ka jingsumar.
