Nongpoh, Naiwieng 25: Ki samla pule ka Mahatma Gandhi University 13mer Byrnihat na ka Law Department, mynta ka sngi ki la ai ka jingiaroh kaba khraw ia ka tnad Pulit Ri Bhoi, halor ka jingshim khia ban tehlam ia ki kali ba pynkhein ain bad ban ia khun pyrshah ia kiwei kiwei ki kam sniew na ka bynta ka jingshngain ki paidbah ym tang ha ka leit ka wan bad ruh kiwei ki kam thombor ba ki ioh jingshngain na ka jingtrei borbah ka tnad Pulit na Ri Bhoi.
Ka kyntien ba ki samla pule ki iaroh ia ki Ri Bhoi Police, ka dei ka kyntien kaba ai mynsiem ba ki pulit ophisar bad kiwei kiwei ki pulit kin dang lah ban trei shitom na ka bynta ban shakri hok ia ki paidbah. Ka kyntien kaba ong, “Im slem Ri Bhoi Police’ ka dei ka kyntien kaba la mih na ki samla pule ka law department ka Mahatma Gandhi University, Byrnihat.
Na ka liang ki samla pule mynta ka sngi ym tang ba ki jinghikai kumno ban pyniaid ia ka traffic kaba ki la leh ryngkat bad ki pulit ophisar ha sor Nongpoh, hynrei la pynlong ruh ia ka jingai jinghikai ha Nongpoh Police Station ban pynshai halor shibun ki kyndon jong ka Traffic rules bad ruh ka Motor vehicles Act ba ki hap ban tip ia ki kyndon ba lada ki pynkhein ain kin ngat ha ki section bapher bapher jong ka Motor Vehicle Act.
Ia kane ka jingai jinghikai la ialam da u Traffic in-charge ka Nongpoh Police Station u Rubul Ali lem bad kiwei kiwei ki ophisar bad ryngkat ki professor bad ki samla pule ka Mahatma Gandhi University.
Ki katto katne ki samla pule ka Mahatma Gandhi University haba kren sha ki lad pathai khubor, ki la pynpaw ia ka jingkmen ban ioh kum kane ka lad ban ia wad jingtip na ki pulit ophisar na ka bynta ban tip halor ki kyndon bapher bapher bad lyngba kane ka prokram ki la pynpaw ruh ba ki la ioh jingmyntoi shibun eh ba ki la ioh jingtip ia ki kyndon ne ki section bapher bapher ba kumno kin nym pynkhein ia ki kyndon haba niah kali.
Ha kawei ka bynta ki la ai khublei ruh ia ka tnad Ri Bhoi Police kaba la shim khia bha na ka bynta ka jingshngain ki paidbah ha ka leit ka wan bad kumjuh ruh ban ia khun ia kiwei kiwei ki kam sniew bad ki la iaroh ruh ia u khlieh duh ka tnad Pulit u VS. Rathore bad ki ophisar kiba la trei bor bah ban ai shisha kata ka jingshakri na ka bynta ka jingbit jinngbiang bad ka jingsngain ki paidbah ha Ri Bhoi District.
