Shillong, Naiwieng 22: Ki Nongtrei Muster Roll jong ka Jylla Meghalaya hynne ka sngi kila ai por haduh 10 tarik Nohprah 2025 iaka Sorkar Jylla ban pynurlong iaki 3 tylli ki mat jingdawa.
Ia kane ka rai la shim haka jingialang jong baroh ki nongtrei Muster Roll jong ka Jylla kaba la long ha Madan Malki Shillong.
Ki mat jingdawa ki kynthup ban pyntreikam iaka Floor Rate, VDA katkum ka Minimum Wage Act 1948, ka Maternity Leave bad ka Employees Provident Funds.
Haba kren shaki lad pathai khubor u President ka All Jaiñtia Muster Roll Workers Union (AJMRWU) u Bah Khroo L Pariat u la ong ba haka jingialang baroh ki nongtrei Muster Roll kila ia mynjur lang ban ai por iaka Sorkar Jylla haduh 10 tarik Nohprah ban pynurlong iaki 3 tylli ki mat jingdawa.
U Bah Khroo u la ong ba haka jingialang mynta ka sngi la wan shim bynta da baroh ki nongtrei Muster Roll na kylleng ka Jylla Meghalaya ban iakren halor ka jingbym hun iaka jubab bala ai da u Commissioner Secretary ka tnat Finance ka Sorkar Jylla.
U la iathuh ba haka jingialang bad u Commissioner Secretary ka tnat Finance ka Sorkar Jylla, la pyntip shaki nongtrei Muster Roll baka Sorkar kam lah ban pynkiew iaka bai nong namar ba ki marbam hapoh Meghalaya kim rem ka dor lada nujor bad kiwei ki Jylla hapoh ka Ri.
“Haka jingshisha ngim kwah ban iakhih pyrshah iaka Sorkar Jylla hynrei lada ka Sorkar kam pynurlong iaki mat jingdawa hapoh 10 tarik Nohprah, kum ki nongtrei Muster Roll ngim banse ban mih surok bad ban ap miet Christmas hakhmat ka khyrdop Secretariat Shillong” la ong u Bah Khroo.
U la ong ba ha kane ka jingïalang, ki nongtrei Muster Roll kila shim ïa ka rai ban aiti da ka shithi sha u Myntri Rangbah u Conrad K Sangma ban dawa pynurlong iaki jingdawa.
