Nongpoh, Naiwieng 24: Shibynta ban leh ia ki kam babha ha shnong ha thaw bad ruh ban pynsngewthuh ia ki khun samla jong kane ka juk halor ka jingma bad jingshah ktah na kaba pyndonkam ia ki Social Media lyngba ki Mobile phone, ka shongkha shongman bym pat dei por bad ruh ka jingkynrei jong u Drok ha ka imlang sahlang, ka Seng Kynthei na ka shnong 14 bad 15-Mer Nongthymmai Byrnihat ha ka Sngi Saitjain, ki la pynlong ia kawei ka prokram, kaba long kum ka jingai jinghikai sha ki samla, ba kin kiar ha ka rukom pyndonkam ia ki Social Media bad kiar raimaw raiding na kaba pyndonkam ia u Drok.
Ia katei ka prokram la pynlong ha shnong Nongthymmai 15-Mer, ha kaba la sakhi da ka jingdon u Bah Sosthenes Sohtun, MLA Jirang bad uba dei ruh u Myntri Sorkar, uba la long kum u Kongsan, nangta ka Kong Rona Khymdeit MDC Nongpoh, kum ka Symbud Kongsan, ha ryngkat ka jingdon ki briew ka koit ka khiah, ki nongialam balang lem bad ki riew paidbah na katei ka shnong.
Ki nongai jingkren ha katei ka sngi, ki la pynpaw ia kata ka mynsiem kaba sngewkhia eh, ban iohi ba bun na ki khun samla ha kine ki sngi, ba ki la pyndonkam ia ki rynsan Social Media, ha kaba kim don por shuh ban iakren ne iaphylliew ha iing ha sem, nalorkata lyngba ki Social Media ka poi ruh sha ka shongkha shongman kaba ym pat dei por ne wat ban ngop sha ki kam dih Drok.
Kum ban pynpaw ka jingburom na ka liang ka Seng Kynthei, ka la ai da ki jingai sngewbha sha ki longkmie bad longkpa bad sha kito kiba la noh ka rta da ki jingai sngewbha, nangta sha ki nonghikai ba rim kiba hikai ha ki skul shnong, sha ki nongtrei Asha, Aganwadi bad iaki wei kiwei de ki ba la ju don lang bad ki seng long kmie shnong ban trei na ka bynta ka bha ka miat ha shnong ha thaw.
