Nongpoh, Lber 14: Namar ka jingjur palat jong ki kam sniew kiba mih na ka jingdie bad jingdih ïa ki jingdih pynbuaid, ka Dorbar Shnong Lumdaitkhla Bhoirymbong ka la shim ïa ka rai kaba tyngeh ban khang syndon ïa baroh ki dukan die kyiad beaiñ kiba don hapoh u pud u sam jong ka shnong.
Ha ka jingïalang kaba la long mynta ka sngi, hadien ka jingïapyrkhat sani bha, ka Dorbar Shnong ryngkat bad ki seng longkmie ka shnong ki la rai ba kin ym shah shuh ïa kino kino ki briew ban die kyiad ne kiwei ki jingdih pynbuaid hapoh ka shnong.
U Rangbah Shnong, u Bah Tennyson Buiam, haba pyntip ïa kane ka rai u la ong ba ka shnong kan ym ailad ïa kino kino ki dukan die kyiad, khamtam ïa ki bar jylla ne kiba wan shong wai na kiwei pat ki shnong kiba ju leh ïa kane ka kam hapoh ka thaiñ.
Ki nongïalam shnong bad ki seng longkmie ki la ai ruh ïa ka jingmaham kaba tyngeh sha baroh ki nongshong shnong ba lada lap ïa kino kino kiba pyrshang ban leh pyrshah ïa ka aiñ shnong, kin shah pynshitom katkum ki kyndon ba la buh da ka Dorbar Shnong.
Ha kajuh ka por, ki seng longkmie ki la khot bad wer ïa ki paidbah shnong ban ïa snoh kti lang bad ka shnong ban ïakhun pyrshah ïa ki jingsniew kiba la sdang ban jyllei ha ki shnong ki thaw.
