Shillong, Lber 13: Haka jingbteng ban kem iaki ba donkti lute naki kor ATM, ki Pulit ka East Khasi Hills kila kem ia 6 ngut ki snar lute pisa naki kor ATM kiba don ha kylleng ka District.
Haba kren sha ki lad pathai khubor, u SP ka East Khasi Hills u Bah Vivek Syiem u la iathuh ba 2 ngut kiba shah kem kidei na Shillong kata u John Fishal Lyngkhoi (32 snem) na Umpling bad u Joyous Dura (47 snem) na Mawlai Nongkwar, 2 ngut kidei naka Jylla Haryana kata u Salim (26 snem) naka shnong Dorakhi, Mewat bad u Rahul (31 snem) naka shnong Bazidpur, Nuh District bad 2 ngut naka Jylla Assam kata Rejaul Korim (38 snem) naka shnong Chakla bad u Lius Ali (28 snem) naka shnong Boragaon.
Kane ka jingshah kem kadei halor ka jingdonkti jong ki ban lute iaka ATM na Mawkriah haka 21 tarik Jymmang 2025 ha kaba kila ioh rah ka pisa T.38,13,100, haka 30 tarik Nohprah 2025 kila ioh lute T.35,57,000 naka ATM ha Smit bad haka 8 tarik Rymphang 2026 kila lute T.35,00,000 naka ATM na Mylliem.
Haba kadei bad kane ki Pulit ka East Khasi Hills kila Register Case ha Mawngap PS Case No. 26(05)2025 u/s 11/3(5)/305(A)/326(F) BNS, Madanrting PS Case No. 209(12)2025 u/s 306(a)(e)/324(2)(3)(5)/ 326(f)(g)/329(2)/111/3(5) BNS and Mawngap PS Case No. 11(2)2026 u/s 305(a)/111/ 326(f)/ 3(5) BNS.
Ki Pulit ka East East Khasi Hills kila thung da ka kynhun Special Cell ba khlieh da u Dy. Superintendent of Police (Operation) u Simseng Sangma haka 27 tarik Rymphang bad sdang ruh iaka jingtohkit.
Kane ka kynhun ka hiar shaka Jylla Haryana haka 9 tarik Lber bad haka jingiatreilang bad ka Central Investigation Agency (CIA) jong Nuh District bad ki Pulit ka Haryana kila ioh kem ia u Salim bad ia u Rahul.
