Shillong, Lber 13: U Superintendent of Police (SP) ka East Khasi Hills u Bah Vivek Syiem ula iathuh baka jingsiat kuli ki Pulit ha kawei ka jingjia hapoh ka Jylla Haryana kadei ban iada iala ka jingim bad ban khanglad iaki paidbhur ban pyllait ia u snar nonglute pisa naki kor ATM.
Lah ban kdew ba kala don kawei ka Video ba saphriang bala iohi ba ki Pulit ka Jylla Meghalaya kiba don haka kali kila ialeh ban beh iaki paidbhur kiba tur shaka kali ba ki shong bad bad la iohi ruh ba uwei napdeng ki Pulit ula synreit kuli ha kaba uwei napdeng ki paidbhur ula kyllon hadien ba dei u kuli na kjat.
Haba pynshai halor kane ka jingjia, u Bah Vivek ula iathuh ba kila don ym duna 30 ngut ki paidbah kiba tur shaka kali ba shong ki Pulit ka Meghalaya kiba kit ia uwei napdeng kiba shah kem napoh ka Jylla Haryana.
U Bah Vivek ula iathuh ba ki paidbhur kila hylla, kawang mang iaka kali bad don ruh hapdeng jong ki, kiba thmu ban kiew shaka kali, nalor ka jingthmu ban knieh iaki tiar ialeh jong ki Pulit bad pyllait ia u snar nonglute.
“Kum shi bynta ban iada iala ka jingim bad khanglad iaki paidbhur ban pyllait ia uba shah kem, ki Pulit ka Meghalaya kim banse ban synreit kuli haduh 7 sien bad hapdeng ka jingsynreit kuli, uwei napdeng ki paidbhur ula mynsaw na bynta ka kjat” la ong u Bah Vivek.
U Bah Vivek ula iathuh ba kane ka jingjia kala jia haka shnong Sikrawa ka Jylla Haryana.
U la iathuh ba ki bor Pulit ka Jylla Haryana kila ujor ejahar pyrshah ia 12 ngut napdeng ki paidbhur kiba tur shaka kali jong ki Pulit ka Jylla Meghalaya.
