Nongpoh, Naiwieng 03: Ki ar ngut ki samla ki la duh noh ia la ka jingim mynta ka sngi u Blei ha ka por 9 baje tam, hadien ba ki la shah iuh noh ha kawei ka trok kaba thuk thuk kaba ki shong ka la leit ban tynrah ia ka taiar katei ka trok.
Kane ka jingjia ka la jia ha ka surokbah National Highway-6 ba hap ha ki bynta jong ka shnong Shangbangla ha Ri Bhoi District.
Kumba la ioh lum jingtip, la ong ba ka kawei ka thuk thuk Royal Enfield kaba don ia u number AS 01 FF 3367 bala ñiah da u Nilutpal Dowari (23) bad la shong lang da kawei ka samla ba la tip kyrteng Gargee Chutia (21) kiba dei naka jylla Assam ki dang thmu ban kiew sha Shillong, hynrei kane ka jingjia ba sngewsih ka la jia noh ha katei ka jaka hadien ba ha ka jingpynher sted kane ka thuk thuk ka leit ban tynrah na ki bynta ba shadien ka trok kaba don ia u Number AS 01 RC 0413 da ka jingthmu ban iaid shakhmat bad kane ka thuk thuk ka la rung syndon sha khrum ka trok ba ka trok ka la iuh syndon haduh ba ki la duh syndon ia la ka jingim.
Halor kane ka jingjia, ki Pulit ka Nongpoh Traffic hadien ba la ioh jingtip ki la hiar mardor ban leit tohkit bad hadien ba la poi ha katei ka jaka, la lap ba kitei ki ar ngut kiba shong da katei ka thuk thuk ki la khlad noh ha shen na ka jingshah iuh ha katei ka trok.
Ki pulit ki la pynlong ruh ia ka jingtohkit bad ki la rah noh mardor ia ka met jong kine ki 2 ngut ki samla sha Civil Hospital Nongpoh na ka bynta ban pyndep ia ka postmortem examination bad halor kane ka jingjia ki pulit ki la pyntip ruh sha kiba haing jong kine ki 2 ngut ki samla ba kin wan sha Police Station Nongpoh khnang ban lah ban leh katkum ki kyndon jong ka ain.
Shuh shuh, la ong ruh ba ia katei ka thuk thuk bad ka Trok la rah noh sha Nongpoh Police Station khnang ban dang pynlong ia ka jingtohkit kaba bniah halor kane ka jingjia ba kitei ki 2 ngut ki la duh noh ia la ka jingim.
