Nongpoh, Lber 20: Kum shi bynta ban rakhe iaka National Science Day, Ka Alpha English Higher Secondary School, Nongpoh mynta sngi ka la pynlong ia ka ‘3rd Annual Science Exhibition’ ha phyllaw jong ka skul da ka jingangnud ban dang pynshlur ia ki khynnah skul ba kin dang lum jingtip shibun ha kaba ia dei bad kita ki jingstad saian ka juk mynta.
Haba plie ia kane ka science exhibition la shim bynta da ka Principal ka Kong W.K Blah kum ka kongsan bad la sakhi lang ruh daka jingdon lang u Vice Principal u Dr. K.B Kharbteng, u Nonghikai Science u Babu Madhav Singh, kiwei kiwei ki nonghikai bad ki khynnah skul jong katei ka skul.
Ha kane ka science exhibition ki don haduh 22 tylli ki Model kiba la pynkhreh da ki khynnah skul halor ki phang bapher bapher kiba ia dei bad ka jingstad saian. Ki khynnah skul ruh ki la shim bynta shitrhem ban ai jingbatai halor kitei ki model ne ki project ba ki la shna kiba dei katkum ka juk stad saian.
Kumba la pynpaw da Babu Madhav Singh bad ka Principal ka Kong W.K Blah, ki la ong ba ka thong jong ka jingpynlong ia kane ka Science Exhibition ka long ban ai rynsan ia ki khynnah skul ba kin pynpaw ia ki jingstad bapher bapher ba ki don ha kaba ia dei bad ka jingstad saian bad kane ka jingpynlong ia kane ka exhibition ka long ruh ban dang pynshlur ia ki khynnah skul ba kin don kata ka jingsngewtynnad kaba kyrpang ba tip kham bha halor ki jingstad saian bapher bapher kiba dei katkum ka juk stad saian jong ka pyrthei.
