Shillong, Lber 19: U Myntri Rangbah ka Jylla u Conrad K Sangma mynta ka sngi u la pyntip ba ka Sorkar ka la shimkhia bha ban wanrah biang iaka shongsuk shongshngain hapoh ka thain rilum Garo.
Ia kane u Myntri Rangbah ula pyntip hadien ka jingwan kynduh ia u Lat ka Jylla u CH Vijayashankar haka jingsynran lang u Symbud Myntri Rangbah ba khmih iaka tnat kam pohiing (Police) u Bah Prestone Tynsong.
Haba kren shaki lad pathai khubor u Conrad ula iathuh baka jingwan kynduh ia u Lat ka Jylla kadei kum shi bynta ban pyntip haba iadei bad ka jinglong jingman hapoh Garo Hills hadien bala mih ka jingiakynad namar ka jingpyrshah iaki bym dei jaidbynriew riewlum ban ia shim bynta haka ilekshon MDC sha Garo Hills Autonomous District Council (GHADC).
U Conrad ula ong ba naduh ba sdang ka jingiakynad ula don beit ha Garo Hills haki ar taiew bala dep bad ha kine ki por u ioh ban iakren bad u Lat ka Jylla tang naka Phone. “Namar kata nga sngewdei ban iakynduh markhmat bad u Lat ka Jylla ban iasyllok haba iadei bad ka jingjia ha Garo Hills. Haka jingdonlang u Symbud Myntri Rangbah ba khmih iaka tnat kam pohiing (Police) nga la pyntip lut nadong shadong ha u Lat ka Jylla haba iadei bad ka jingjia ha Garo Hills” la ong u Conrad.
U Conrad ula pyntip ba ka Sorkar kala aiti haka tnat Pulit ban leh iaka ba donkam ban tem iaka jingiakynad ne kem ia kino kino kiba donkti ban pynshit ban wanrah iaka jingsngewpher jaidbynriew hapoh ka thain.
“Namar kata katkum ki sakhi sabut, katkum ki ain ki kanun, ki Pulit kin leh iaka ba donkam. Ngam tip, katno ngut ka shah kem, mano ba shah kem, u Superintendent of Police un kham tip kham bha halor kane” ula ong.
U Myntri Rangbah ula pyntip ruh baka jinglong jingman mynta hapoh Rilum Garo kala kham biang, hynrei ki dang don katto katne ki jingjia ha ki katto katne ki jaka. Naka liang ki bor district bad ki Pulit ki peitngor bha ban pynthikna ba ka shong suk shong shngain kan wanphai biang, ong u Myntri.
Shuh shuh, u la iathuh ruh kumba ka shongsuk shongshngain kala wanphai, ki briew kila leit phai biang shala ki kam ba man ka sngi bad hadien bala bishar bniah ngi la weng noh iaka jingkhang iaka Mobile Internet. Kane baroh ka pyni baka shong suk shong shngain kala wanphai biang hynrei ngin iai long kiba peitngor, u la bynrap.
