Shillong, Ïaiong 15: Ha ka jingbteng ban tohkit bad ban tip bniah halor ka jingshah pyniap ka Kong Eilang Phawa, ki pulit ka East Khasi Hills District mynta ka sngi ki la ïalam syndon ïa u Kennedy Khongsit uba la kynnoh don kti ban pyniap sha ka jaka ba la bret bad lap ïa ka metiap jong katei ka lanot ban tip halor kumno ba u la pyniap ïaka (Recreation of Crime) ha Nongrah Lummyrboh.
Ka jingïalam ïa u Kennedy Khongsit sha katei ka jaka, ka long hadien ba ki pulit ki la tip halor ka jingdonkti jong u ban pyniap ïa ka Kong Eilang Phawa bad la ialam ïa u ban batai kumno u la ïalam ïa ka sha katei ka jaka bad ban pyniap ïa ka.
La ïalam ïa u Kennedy ha ryngkat ka jingsynran da ki bor pulit, ka kynhun Forensic Crime Scene Unit ha kaba la sakhi ba ki pulit ki la jurip bad wad bniah ha katei ka jaka ha kaba la tohkit ruh ïa u Kennedy ha katei ka jaka.
Lah ban kdew, ki pulit ka East Khasi Hills District ki la kem ïa u Kennedy Khongsit halor ka jingkynnoh donkti jong u ban pyniap ïa u heprit ba dang 7 snem bad hadien pat la lap sa ïa ka metiap jong ka Kong Eilang Phawa na ka wahduid ha Nongrah Lummyrboh ïa kaba la tip ruh ba ka don ka jingithuh ithaw bha ïa u Kennedy.
Ka Kong Eilang Phawa ka la jah na la iing ha ka 20 tarik Lber 2026 na Nongthymmai Lawjynriew bad la lap pat ïa ka metiap ha ka 06 tarik Ïaiong na ka wah ha khappud ka Nongrah Lummyrboh bad Rynjah.
