U nongniah lem bad u nongbud jong kawei ka trok kit clinker kaba don ia u number NL-01-AA-7285, ki la lait thaw na ki jingjia ba sngewsih bad kata ka dei hadien ba katei ka trok ka la kylla ha surokbah NH-6 ha shnong Umsamlem.
Katei ka jingjia ba kylla katei ka trok ka la jia mynta ka sngi ha ka por 2 baje eiei noh phaisngi, ha kaba katei ka trok kaba don ha ka lynti ban hiar sha Assam, ka la kylla noh ha katei ka jaka.
Tang mar ia kylla katei ka trok, khyndiat la don ka jingthut ha ka leit ka wan ki kali ha ka surokbah NH-6 bad khamtam eh kito kiba don ha ka lynti ban kiew sha Shillong, hynrei da ka jingpoi kloi ki briew ka NHAI bad kiba la leit ban pynkhuid kloi ia u klinker uba la hap ha surok, ka la pynlong pat ia ki kali ba kin ïoh ban ïaid suk lyngba katei ka surok.
