Ka Synjuk ki Rangbah Shnong Ri-Bhoi District, mynta ka sngi kila pynpaw ka jingbitar bad ka jingsngewkhia haka juh ka por halor ka jingmynthi jong ka sorkar ban pynlait ïaka pisa bai tiar jong ka skhim bylla 100 sngi ne ka MGNREGA kaba buh jingeh ïakiba bun ki shnong ban pyndep ïaki kam ki jam bad khamtam ban bteng ïaki kam pynroi haki shnong ki thaw.
Haba kren sha ki lad pathai khubor naka liang u Bah BB Makdoh Chairman ka Synjuk ki Rangbah Shnong Ri-Bhoi District u la ong ba naduh u bnai Nailur jong u snem bala dep ka sorkar ka khlem pynlait pisa ha kaba ïadei bad ka bai tiar ne Materials Bill, kiba bun ki shnong ki thaw ha Ri-Bhoi District bad ka jylla baroh kawei ki ud ki lynñiar namar ki kam ki sahkut lut bad wat ki dukan heh kiba ju ai tiar sha ki shnong ki thaw ban pyntrei ïaki kam pynroi kim nud shuh ban bad ki kam ki sahkut lut ha kaba ka sorkar kala shu pynlong langkñia ïaki nongïalam shnong, dap ram kat shaba leit bad lehraiñ wat ban mih madan ruh bad ka roi ka par kam don shuh haki shnong ki thaw.
Naka liang ki nongïalam shnong kila buh ruh ka jingkylli shaei kane ka pisa ka jah, namar kumba long haduh mynta ki nongïalam shnong ki sah haka umdum bad lada ka sorkar kam kwah shuh ban pyntreikam ïa katei ka skhim kala dei ban kren shai ban sangeh noh khnang ba ki nongïalam shnong kin nym khih nym ksar shuh, hynrei kumba ka long mynta la shu pynlong langkñia lada dei ba ka sorkar ka donkam ïaki nongïalam shnong shiteng miet ruh hap ban mih, hynrei ïaka jingdonkam ka shnong bad ka roi ka par, ka sorkar ka sngap man man.
“Hoid ngim pynrem ngi iohi ba ka sorkar kala pyrshang ban kyntiew ha kiwei kiwei ki liang kum ka kam jngohkai pyrthei, ki surok bad kiwei kiwei ki kam pynroi hynrei ka dei ruh ban phai khmat sha ki shnong ki thaw, khamtam ki shnong kyndon kiba donkam ki kam pynroi bad kiba dang don hapdeng ka jingïaleh ban thaw ki kam pynroi haki shnong ki thaw lyngba ka skhim bylla 100 sngi” la ong u Bah Makdoh.
U la ong ruh ba lada ka sorkar kam pynlait ïaka pisa ha kine ki khyndiat sngi naka liang ki Rangbah Shnong kin nym ai shuh ka jingïatreilang bad ka sorkar, bad kane kam dei shuh ka jingkyrpad namar la sat u ryndang, la lut ki kot sada, bad ka dei ka jingdawa kaba khatduh naka sorkar ba kan pynlait noh mardor ïaka pisa bad ha kine ki khyndiat sngi lada ka sorkar ka dang mynthi naka liang ki Rangbah Shnong Ri-Bhoi kin sa lum ruh da ka jingïalang bad kiwei ki Rangbah Shnong na kiwei ki District ban shim rai halor katei ka bynta bad ban leit sha ki bor bahalor.
