Nongpoh, Naitung 16: Da ka mynsiem jong ka jingsngewkhia kum uwei u samla uba don ka jingduna ha ka dkhot met bad ruh na ka bynta ka bha ka miat bad ka jingsngaiñ ki paidbah ha ka leit ka wan u la mih shakhmat ban ai khublei ia ka tnad Pulit ka Ri Bhoi, kaba la shim khia ban teh lakam ia ki Kali, ki Bike bad ki Scooty kiba ju pynher sted bad ñiah khlemakor ba bun sien ki jingwan ki jingjia kiba mynsaw bad kiba sngewsih ha ka surokbah National Highway-6 ha Ri Bhoi District.
Une u samla ba duna ha ka dkhot met bad uba don pat ka mynsiem na ka bynta ka bha ka mait lang ki paidbah, u dei u Samla Paring Pale na ka shnong Umpowin ha Ri Bhoi District.
Haba kren sha ki lad pathai khubor, u Samla Paring Pale, u la ong ba wat la u don kata ka jingduna ha ka dkhot met bad u don pat kata ka mynsiem ia tip lem bad kata ka jingsngewkhia ba bun ki jingjia kiba sngewsih ki ju jia ha ka surokbah ha Ri Bhoi bad ka daw ka dei na ka jingbuaid, ka jingniah khlem akor ia ki Kali, ki Bike bad ki Scooty ba donkam shisha ban pyrkhing bad tehlakam.
Kawei kaba u la iaroh ia ka tnad Pulit Ri Bhoi ha ka jingialam u SP kum ku khlieh ka tnad Pulit ha Ri Bhoi, ka dei ka jingshim khia ka tnad Pulit na Nongpoh ban tehlakam ia ki Bike bad ki Scooty kiba ju pynlong ia ka surokbah National Highway kum ka jaka ialehkai sport bad ai khublei ruh ia u Bah B. Thangkhiew kum u Pulit ophisar u la kren bad ai jingsneng da kaba tyngeh ba kum ki kmie ki kpa kim dei ban ai shabi ia ki khun ha ki sngi U Blei, ha kaba ha ka jaka ba kin leit sha ki jingiaseng bad ki pynlut por pynban ban ialehkai sport ha ka surokbah ba bunsien ki mih jingmynsaw bad ki jingjia ba sngewsih.
Shuh shuh, u la ai khublei kitbok kitrwiang ruh ia ka tnad Pulit na Ri Bhoi da kaba ai mynsiem ba kin dang trei shitom ban tehlakam ia ki jingdih buaid, ki jingpynher sted ha ka por ba niah ia ki Kali khnang ban lait na kino kino ki jingjia ba sngewsih bad lada wan ki jingjia ba sngewsih tang kito ki longïing kiba mad ki sngewthuh ia ka jingshah ktah kaba wan jia tang na ka daw ka jingpynher sted ne buaid haba niah ia ki Kali, ki bike ne ki Scooty, u la bynrap.
