Shillong, Jylliew 09: Wat hadien ba la paw ki jingshisha halor ka jingshah pyniap u Raja Raghuvanshi ha Sohra ba la tip ba la don kti ka Sonam Raghuvanshi bad 3 ngut kiba la shah kem bad u kpa jong ka Sonam u Devi Singh Raghuvanshi u dang da rap jot ba ka dei kaba lui lui bad kaba pynlyngnoh ka long ba u la kynnoh ruh wat ia u Myntri rangbah ka jylla, u Conrad. K Sangma bad wat ia ki Pulit ka Meghalaya ba ki la shu thok ne kynnoh ia ka Sonam, ha kaba u la dawa ruh na ka sorkar India ba dei ban phah tohkit CBI ia u Myntri rangbah ka jylla Meghlaya bad ia ki Pulit ka Meghalaya.
Kane ka jingkynnoh u Devi Singh Raghuvanshi, uba dei u kpa ka Sonam pyrshah ia u Myntri rangbah ka jylla Meghalaya u Conrad K. Sangma bad ia ki Pulit ka Meghalaya, ka dei hadien ba mynta ka sngi u Myntri rangbah ka jylla ha ka rynsan Social Media jong u lyngba ka X, u la pynthikna ba ka Sonam ka la wan pyndem hakhmat ki Pulit bad ruh ba la ioh ban kem haduh 3 ngut kiba la suba don kti ha kaba pyniap ia u Raja Raghuvanshi ha jan Wei Sawdong ha Sohra.
Kaba sngewlyngnoh, nalor ba u kpa ka Sonam ula kynnoh ba la shu thok u Myntri rangbah ka jylla Meghalaya bad ki Pulit, ka dei kaba u la dawa pynban ban tohkit da ka CBI halor ka jingkynoh pyrshah ia ka khun jong u, ba ka don kti ha kaba pyniap ia u Raja Raghuvanshi ha Sohra.
Kumba la ioh lum jingtip, wat ka kynhun Special Investigation Team (SIT) na Meghalaya mynta ka sngi ki la leit hiar mardor sha Uttar Pradesh hadien ba la wan pyndem ka Sonam ha ki Pulit bad ruh ba la ioh ban kem haduh 3 ngut, na ka bynta ban dang pynlong ia ka jingtohkit halor ka jingshah pyniap u Raja Raghuvanshi, ba la suba jur ba la leh da ka Sonam bad ki paralok jongka.
Kumba la pynpaw da u Kpa ka Sonam, ba u la da rapjot ia la ka khun ba ka dei kaba lui lui bad kam don bynta ha katei ka kam, ka la long ka jingartien ha kaba lada pynshong nongrim na ka jingshah pyniap u kurim jongka u Raja Raghuvanshi bad ba la lap ia ka met jong u, balei kam lah ban ujor sha ki Pulit ha Meghalaya bad ka la shu jah pynban khlem tip shuh shaei ka leit kaba la long pynban ka jingpynlut ksan ia ka pla tyngka ka sorkar Meghalaya ban pynlong ia ka jingiawad ia u kurim jongka bad ia ka ruh ha kbaa la shim mynta la bun phew sngi bad la jin ba kam don kti ha katei ka kam ka la dei ban ujor sha ki Pulit ka Meghalaya bad balei pat ka leit poi pynban sha Uttar Pradesh hadien 17 sngi ba ka wan sha Sohra da kaba shu iehnoh ia la u kurim khlem da don jingsngew shuh bad ruh khlem da ujor sha ki bor ka ain.
