Nongpoh, Jylliew 05: Ki nongïalam ka NPP Nongpoh Block bad NPP Ri Bhoi, ha ka jingïalam ka MDC Nongpoh Constituency, ka Kong Rona Khymdeit mynta ka sngi ki la leit ban ïa kynduh syndon ïa u Myntri Rangbah ka jylla, na ka bynta ban ïa kren ne ïa thir ïa ki kam pynroi kiba dang donkam ha Nongpoh Constiteuncy bad ha Ri Bhoi District hi baroh kawei.
Ha kane ka jingleit kynduh ïa u Myntri rangbah ka jylla, u Conrad K. Sangma, nalor ka Kong Rona Khymdeit kum ka MDC, la sakhi lang da ka jingdong u Babu Clement Mawlong, President ka NPP Ri Bhoi, u Bah Thomas Malai, Adviser ka NPP Ri Bhoi bad u Bah Raonald Kharkamni, Working President ka NPP Nongpoh Block.
Ha kane ka sngi, na ka liang ka Kong Rona Khymdeit kum ka MDC bad kitei ki nongïalam, ki la pynsngew shibun ki jingdonnkam ïa ki kam pynroi ha Nongpoh Constituency bad kumjuh ruh ha Ri Bhoi District, ba ki paidbah ki dang donkam shibun ki kam pynroi.
Ka Kong Rona Khymdeit ka la dep ruh ban ai dorkhas halor shibun ki kam pynroi ha Nongpoh Constituency ba ki la pynsngew sha u Myntri rangbah ha kane ka jingïakynduh lang bad na ka liang u Myntri rangbah ruh u la kular ban shim khia ban wan rah ïa ki kam pynroi ha Nongpoh Constituency.
Kawei na ka phang kiba la ïa kren ruh ka long ban dang pynkhlain ïa party NPP ha Nongpoh Constituency bad ha Ri Bhoi, khamtam hadien ba ka Kong Rona Khymdeit ka la jop kum ka MDC na Nongpoh Constituency ba ki la rai ban dang pynkhlain ïa ka party na ka bynta ban dang ioh pdiang shibun ki kam pynroi kiba u paidbah u donkam ha Nongpoh Constituency bad ha Ri Bhoi hi baroh kawei.
