Shillong, Jylliew 09: Katba kiba bun ki paidbah ka jylla ki sah ha ka umdum halor ka jingshah pyniap jong u Raja Raghuvanshi, ka khubor kaba shai mynta kala pyrthei bad kata ka long ba ia u Raja, la pyniap da ki runar kiba la aiwai da ka lok ka jong u hi, ka Sonam Raghuvanshi haka por ba ki dang wan shangkai Honeymoon ha ki thain Sohra.
Katkum ka tyllong khubor ba la iohlum, la iathuh ba katei ka lok jong u Raja, ka Sonam, kala leit ban pyndem ialade hakhmat ki pulit jong ka Ghazipur ka jylla Uttar Pradesh bad ia uwei na ki runar la iohkem na Uttar Pradesh, ar ngut na ka jylla Madhya Pradesh bad ka jingthwet sa ia uwei de ka dang iaid shakhmat.
Na ka liang u Myntri Rangbah ka jylla, u Conrad K Sangma, u la iathuh lyngba ka sla X, ba hadien hynniew sngi jong ka jingtrei shitom, ki pulit ki la lap ksai noh halor ka jingpyniap jong u Raja Raghuvanshi bad ai khublei ruh iaki bor pulit ka jylla Meghalaya kiba la trei shitom halor kane ka kam.
