Shillong, Lber 12: Wat la ki bor syntiat ka sorkar ki la ai jingtip lypa ha u Myntri rangbah ka jylla ba u hap ban kynriah ia lade bad kiba haïing ha sem na ka ïingsah jongki ba ki la ioh jingtip ba ki lah ban don ki kynhun ne ki riew shimet kiba thmu ban hiar thma ia ka jaka sah jong u, hynrei u Conrad K. Sangma kum u myntri rangbah ka jylla u la kyntait ia kane ka jingiathuh lypa da kaba ong,”‘Ba un nym kynriah na ka jaka sah jong u bad ka ing ka sem bad un nym tieng satia hi ruh, namar ka jingim jong u bad ka ïing ka sem ka shong ha ki ksangkti ba don bor jong u Trai’.
Ia kane la kren hi da u Myntri rangbah ka jylla hynnin ka janmiet, haba u la kyrpad jur ia ki paidbah bad khamtam ha Rilum Garo ba kin pynneh ia ka shongsuk shongsain bad ban nym shim ia ka ain ha ki kti ba kane ka ktah shisha ia ka shongsuk shongsain ki paidbah.
Haba kren lyngba ka dur khih kaba u la pynlait paidbah, u Conrad K. Sangma u la iathuh ba u la ioh pdiang ia ka jingtip na ki bor syntiat ba ki lah ban don ki kynhun ne ki riew shimet kiba thmu ban wan hiar thma iaka jaka sah jong u da ka jingthmu ban thang bad ban pynjot, hynrei da ka jingshlur u la pynpaw ba un nym kynriah bad um don satia kata ka jingtieng ka jingsmiej.
“Nga ruh ka dei u jaid bynriew Achik (Garo) bad ka snam jong u kpa jongnga u P.A Sangma ka don hapoh jongnga bad ngam don jingtieng da kaba nga bud ia ka jingshlur jong u. Nga ieit ia la ka jaid bynriew lajong bad shakri ruh na ka bynta ki jaid bynriew naduh ka mynsiem bad ka dohnud” ong u Conrad K. Sangma.
Shuh shuh, u Myntri rangbah ka jylla u Conrad K. Sangma u la ban khia ban wan rah biang ia ka shongsuk ka shongsain bad ban nym wan rah ia ka huri hura kiba pynjot pynpra kiba long ka jingduhnong bad dei tang lyngba ka jingiakren iasuk ngin lah biang ban wan rah ia ka shongsuk shongsain ha Rilum Garo, u la bynrap.
