Nongpoh, Lber 11: Ki Khun Samla Pule jong ka dong Ribhoi District kiba la mihkhmat naki Shlem pule bapher bapher ki la ïa shimbynta shitrhem ban ïa kren bad ïatai haka rynsan pyni nia lane ka “Dorbar Samla” kaba la tip kum ka District Level Viksit Bharat Youth Parliament kaba la long mynta ka sngi ha Ribhoi College.
Ka Viksit Bharat Youth Parliament ka dei ka rynsan kaba kyrpang ban ai lad ïa ki samla ban pynpaw ïa ki jingmut jingpyrkhat jong ki ha ki jingïakren kiba kongsan shaphang ka ri. Ka jingthmu jong kane ka prokram ka long ban pynshlur ïa ki samla ban ïashim bynta ha ki jingïatai bad pyni nia bad ban ai jingmut katkum ka jingïohi jngai jong ki na ka bynta ka thong Viksit Bharat@2047.
Kane ka rynsan ka thmu ban kyntiew ïa ki samla kiba don ïaka jinglong kum ki nongïalam. Ha kane ka rynsan, ki samla pule ki ioh lad ban ïatai bad ban kren ïa ki mat kiba kongsan ha ka ri halor ka phang “50 Years of Emergency, Lesson for Indian Democracy”, kumjuh ruh ban ai jingmut katkum ka jingiohi jngai jong ki hakaba ia dei bad ka jingkyntiew ïaka Ri.
Ïa katei ka Dorbar Ki Samla lane ka “Viksit Bharat Youth Parliament” la pynlong daka National Service Scheme NSS Unit Ribhoi College haka jingiasnohkti lang daka ophis u Deputy Director jong ka My Bharat Ribhoi District.
Ha kane ka sngi la wan ban ïa sakhi lang daka kong Balakyntiew Rani ADC Ribhoi kum ka kongsan, kong Y.V. Syiemlieh Program Ophisar NSS Ribhoi College haka jingiadonlang ki Jury Member lane ki nongbishar kiba kynthup ïa u Michael T. Mate, Deputy Director, MY Bharat Ri-Bhoi, Bah Mathew Makdoh, MDC, KHADC, Dr E. Kharkongor, principal Ri Bhoi College Kong L. Iawphniaw Asst.professor, KongPatricia Lyngdoh, Assistant public prosecutor.
Hakaba kut jong katei ka Dorbar pyni nia la sam ruh iaki khusnam sha ki nongjop hakaba u Gaurov Kumar Barua u la long nyngkong, u Samla Lamphrang Tynsong la wan baar bad u Wanmi Russel Makdoh la wan balai bad kine ki samla ha ryngkat ki 7 ngut kiba la shah jied kin sa leit ban ïashimbynta haka State Level ka ban sa long ha Nongbah Shillong
