Shillong, Lber 11: U Symbud Myntri Rangbah ba khmih iaka tnat kam pohiing (Police) u Bah Prestone Tynsong mynta ka sngi ula kyntu iaki paidbah jong ka rilum Garo ban kiar ha kaba shim iaka ain ha kti bad ban wan shaka miej jingiakren ban pynbeit haba kaba ia dei bad ka jingïakynad kaba la mih ha rilum Garo.
Haba kren shaki lad pathai khubor u Bah Prestone u la kubur ba haduh mynta ka jinglong jingman ha rilum Garo kam pat long kaba shngain hynrei watla kata ruh ki bor district bad ki bor pulit ki ialeh kaba lah ban tem iaka jingïakynad.
U Bah Prestone u la ong ba ka Sorkar kala shimkhia iaka mat jingdawa ki jaidbynriew riewlum Garo bad dei namar kata kala pynsangeh shwa iaka jingthmu ban pynlong iaka ilekshon MDC sha Garo Hills Autonomous District Council (GHADC).
“Namar kata nga kyntu iaki paidbah bad ki sengbhalang bapher bapher na rilum Garo ban wan shakhmat ban ïakren bad ka Sorkar. Ka Sorkar kan sngap iaki jingsnegwkhia bad ki jingai jingmut jong phi ban pynbeit ïa kiei kiei baroh bad khamtam eh ban wanrah biang iaka shongsuk shongsain hapoh ka thaiñ” la ong u Bah Prestone Tynsong.
U Bah Prestone u la ong ba ka Sorkar ka kloi ban khot ïakren bad baroh ki nongialam na ki kynhun bapher bapher, la kadei naki kynhun bym dei riewlum ne naki kynhun riewlum Garo.
Shuh shuh, u la pynpaw ba ka jingïakynad kaba la jia ha rilum Garo kadei kaba ym lah ban pdiang bad kane ka jingïakynad kala wan rah ruh shaka jingshah pynjulor ki jingdon jingem, ki Building, ki dukan bad kiwei kiwei de.
