Shillong, Rymphang 10: U Symbut myntri ka jylla u Bah Sniawbhalang Dhar mynta ka sngi u la kyrpad jur ban nym shim kabu na ka jingjia ba sngewsih ha Mynsngat kaba dei na ka jingbthei ka par dewiong beain lane ban nym pynlong kam politik, namar na ka liang ka sorkar jylla ka la dep ban pynthikna ban leh da kaba tyngeh ia kino kino kiba don kti ha kaba pyniaid ia katei ka jingtih dewiong beain ha katei ka jaka.
Haba kren mynta ka sngi sha ki lad pathai khubor, u Bah Sniawbhalang Dhar u la ong, ba u phah ia ka khubor ka jingsngewlem sha kito kiba la shah ktah bad kiba la duh ia la ki baieid ba thoin ha katei ka jingbthei ka par dewiong ha Mynsngat kaba la shim haduh 28 ngut ki mynsiem kiba kordor.
Haba phah ruh ia ka khubor snglem sha kito kiba shah ktah ha kane ka jingjia, u Bah Dhar u la kyrpad jur ruh ia ki ba kim dei ban pynlong politik ia kane ka kam bad ka la dei ka por ba hap ban ia trei lang ba kum kine ki jingjia ba sngewsih kin nym dei shuh ban jia ha ki sngi bad ki por ban sa wan.
U la pynthikna ruh ba ka sorkar ka la shim da ka lad kaba tyngeh halor kane ka jingjia bad la dep ruh ban phah ia ki bor sorkar ba kynthup naduh u Deputy Commissioner bad u Superintendent of Police ban dang tohkit bniah halor kane ka jingjia bad ban leh da kaba tyngeh katkum ki kyndon ka ain.
“Ngin nym map ia kino kino kiba don kti ha kane ka kam beain” ong u Bah Dhar bad bynrap ruh ba kin leh da kaba tyngeh ia kito kiba don kti hakhmat eh ha kane ka kam beain,” u la ong.
