Nongpoh, Rymphang 10: Ka Ophis u District Sports Officer (DSO), Ribhoi District, ka la ioh ban pynlong ïa ka lympung ïalehkai Kho-kho bad Kabaddi, kiba dei ki jingialehkai Rural Games jong ka Directorate of Sports & Youth Affairs, ha Madan NSCA, Pahamsyiem, Nongpoh.
Ha kane ka jaid jingialehkai la wan ban shim bynta shitrhem da ki samla kynthei bad shynang na ki shnong bapher bapher ka Ri Bhoi bad ka jingwan shim bynta jong ki ka la pynlong ia kane ka jingialehkai kaba jop.
Haba kren sha ki lad pathai khubor, ka Kong Rida Lyndem, PTI, na ka liang ka Ophis u DSO Nongpoh, ka la pyntip ba ha kane ka lympung la wan ban ïa shimbynta da ki khun samla kynthei bad shynrang na ki shnong bapher bapher hapoh ka them Ribhoi ban ïashimbynta ha ka jingïalehkai Kho-kho bad Kabaddi.
Ka la ong ruh ba kane ka lympung ka dei kaba la pynlong kyrpang ban pynkhlain bad kyntiew ïa kine ki artylli ki jingïalehkai hapoh ka jylla, kiba long ruh ki jingïalehkai ba kongsan hapoh ka jingïakob Rural Games jong ka Directorate of Sports & Youth Affairs bad ka jingïawan ban ïashimbynta shitrhem jong ki khun samla ka Ribhoi ka la pyni shai ba kane ka sngi ka la long kaba jop bha.
Ka Kong Rida Lyndem ka la ai khublei kyrpang ïa ka Ribhoi Kho-kho Association kaba la shimkhia ban pynwan ïa ki samla ïalehkai sha kane ka lympung. Ka la ai jingïaroh ruh ïa baroh ki khun samla kynthei bad shynrang kiba la wan sha kane ka sngi bad ban shim bynta shitrhem ha ki jingïalehkai.
Ha kaba kut jong katei ka lympung, ka Ophis u District Sports Officer ka la sam ïa ki khusnam sha baroh ki kynhun kiba la jop ha ki jingïalehkai bapher bapher kaba long ruh kum ka dak jong ka jingïaroh bad ka jing ai mynsiem ïa ki nongialehkai.
