Shillong, Rymphang 10: Ka Jaintia National Council kala dawa naka sorkar ba dei ban pynlong ka jingtohkit kaba bñiah halor ka jingbthei ba dangshen ha par dewiong beaiñ haka thaiñ Mynsngat-Thangsko kaba la shim ruh haduh 28 ngut ki mynsiem briew bad kum ka seng kala dawa ruh ban dei ban tohkit bñiah halor ka jingioh rung laitlan ki nong Bangladesh sha East Jaintia Hills District.
“Ngim lah ban pdiang ïa kane ka jingjia ba sngewsih kum ka jingjia kaba malu mala. Ka don ka jingsuba kaba jur ba kane ka dei ka jinghiar thma ïa ki shnong ki thaw jong ngi,” la ong u president ka JNC u Sambormi Lyngdoh haba kren sha ki nongthoh khubor mynta ka sngi bad kum ka seng ka dap da ka jingsngewkhia kaba jur halor ka jingdon ki nong Bangla ha katei ka jaka da kaba kynnoh ruh ba ki dei kiba la byrngem ban pynthud ïaka suk ka saiñ haka thaiñ NE.
Ka seng kala dawa ruh ba ka jingtohkit kam dei ban long tang haka jingtih dewiong beaiñ hynrei ban shimkhia ruh ïaka jing ioh rung laitlan ki nong Bangla sha katei ka jaka bad kum ka seng kala dawa ruh naka sorkar jylla ba ka dei ban shimkhia bad leh da kaba tyngeh pyrshah ïaki nongwei kiba wan buhai sha katei ka jaka bad kum ki trai muluk kim kwah ba ka pliang ja yn wan ban knieh da kiba nabar kiba shu wan sah beaiñ.
Shuh shuh ka seng kala kyrpad ruh ïaka tnad pulit ban kren ïa baroh kiba donkti ha katei ka kam khamtam kiba donkti ban wanrah ïaki nong Bangla ban pynsah bad pyntrei beaiñ ha katei ka jaka namar kum ka seng kam kwah ba ka pateng ban wan kan don haka jingma tang namar ka jingkhwan myntoi shimet.
Naka liang ka seng kala kyrpad ruh sha u Myntri Rangbah ka ri bad kumjuh ruh u Union Minister ban shah ïaka jingtih dewiong katkum ka juk stad haka jylla Meghalaya da kaba bynrap ruh ba kane kan pynduhjait ïaka jingtih beaiñ ïa u dewiong ka ban pynmyntoi ïaki paidbah bad kumjuh ruh ka sorkar jylla.
Utei u nongïalam u la ong ruh ba kane ka jingjia ha Mynsngat-Thangsko kala pynkhynniuh ym tang ha Meghalaya hynrei haka ri India baroh kawei wat u Myntri Rangbah u la kular ban siew bai lutksan sha ki longiing ba ngat ha katei ka jingjia bad bun ki myntri kila pynrem ïa kane ka jingjia.
