Nongpoh, Rymphang 10: Ha kawei ka jingjia aksiden, u wei u rangbah u la duh noh syndon ïala ka jingim hadien ba ka kali kaba u ñiah kala hap sha riat ha Makoibari, Mawdiangum ha Ri-Bhoi District.
Katkum ka jingtip bala ioh lum la ong ba kane ka jingjia kala jia mynta ka nohphai sngi haka por kumba 1:20 baje eiei ha kaba kawei ka Jeep kaba don ïa u number ML 10 1027 bala ñiah da u Bah Rymphangsngi Blah 65 snem ka rta naka shnong Saiden, Ri-Bhoi District ka dang mih na Makoibari ban mih sha surok bah haka shnong Mawdiangum.
La ong ba ha katei ka por ka kali ka iap kynsan, hynrei u la pyrshang ban pynnoh ïaka ban ioh pynim ha u gear, hynrei u la hap pynban sha riat ryngkat katei ka kali haduh ba u la mynsaw jur bad pynkit mar mar sha Bethany Hospital Nongpoh naka bynta ka jingsumar hynrei ki doctor kila pyntip ba u la khlad noh shuwa ban poi sha Hospital.
Naka liang ki bahaiing kila kyrpad ruh ban pynlait ïaka post Mortem, bad hadien bala pyndep katkum ki kyndon jong ka aiñ naka liang ki pulit kila aiti noh ïa utei u rangbah sha ki bahaiing ban pyndep ïaka jinglehniam ba khatduh.
