Ki ar ngut ki nongtuh Masi ki la shah bat ha ka shnong bad ki paidbah nongshong shnong ka Shnong Pamlaban ha Ri Bhoi, kaba dei hadien ba ki la leit tuh ia 2 tylli ki Masi na kawei ka sem Masi ha katei ka shnoing ba ki trai masi hadien ba ki la ioh sngew ki la pyrtan bad pan jingiarap na ki paidbah ka shnong.
Kane ka jingjia ka la jia mynta ka step ha ka por 12.30 baje mynstep, ha kaba ki 4 ngut ki nongtuh ki la wan da kawei ka kali Bolero Pik-up kaba don ia u number ML 10 D 2373 bad 2 ngut kitei ki nongtuh la ioh bat da ka shnong bad 2 ngut pat ki la lait ban phet.
Dei lyngba ka jingmih ki paidbah, ka shnong ka la ioh ban kem ia 2 ngut kata ia u Daman Myrsing na ka shnong Pomphlang bad u Skoting Manih na ka Shnong Umkra ha ryngkat katei ka Kali Bolero Pik-up bad 2 tylli ki Masi ki masi ba ki la tuh. Ki 2 ngut pat kiba la don kti ban tuh lang ia ki Masi bad kiba la lait phet noh la tip kyrteng kum u Phridian Myrsing bad Polman Umbah na ka Shnong Mawtari Thaiang.
Na ka liang ka shnong ki la pynlong ia ka jingbishar pyrshah ia kine ki nongtuh ban leh katkum ki kyndon jong ka ain Shnong ha ryngkat ka jingdon lang kiba haïing kitei ki nongtuh Masi.
